Хезболах негира дека испратил свои борци во Украина како поддршка на руските трупи

БЕЈРУТ (АА) - Либанската група Хезболах негира дека испратила борци во Украина како поддршка за руските трупи додека војната на Москва против Киев влегува во својата четврта недела, јавува Агенција Анадолија (АА).

„Категорично ги демантирам овие тврдења“, рече генералниот секретар на Хезболах, Хасан Насрула, во телевизиски говор доцна синоќа.

Тој додаде: „Никој од Хезболах, ниту борец ниту експерт, нема отидено на тоа бојно поле.“

Киев претходно тврдеше дека Москва регрутирала околу 1.000 борци од Сирија и Хезболах за да се борат во Украина.

Тоа дојде откако рускиот претседател Владимир Путин минатата недела даде зелено светло за распоредување доброволци од Блискиот Исток заедно со побунениците поддржани од Москва за да се борат во Украина.

На состанокот на рускиот Совет за безбедност во Москва, Путин рече: „Ако увидите дека има луѓе кои сакаат да дојдат на доброволна основа, не за пари, и да ги поддржат луѓето што живеат во Донбас, ние треба да дојдеме да ги запознаеме и да им помогнеме да се префрлат во воената зона.“

Рускиот министер за одбрана, Сергеј Шојгу, соопшти дека има 16.000 доброволци на Блискиот Исток кои се спремни да дојдат да се борат заедно со силите поддржани од Русија во регионот Донбас во источна Украина.

Руската „специјална воена операција“, што започна на 24 февруари, наиде на меѓународна осуда, предизвика сериозни финансиски рестрикции кон Москва и поттикна заминување на големите странски компании од Русија.

Досега, во војната во Украина, според податоците на Обединетите нации загинале најмалку 816 цивили, а 1.333 се повредени, а од ОН нагласуваат дека бројката е веројатно поголема. Над 3,27 милиони луѓе побегнале во соседните земји, соопшти Агенцијата за бегалци на ОН.