Ikrame Imane Kouachi
22 Март 2025•Ажурирај: 24 Март 2025
САНА (АА) - Јеменските Хуси денес соопштија дека го нападнале израелскиот аеродром Бен Гурион со хиперсонична ракета, трет пат во 48 часа, пренесува Анадолу.
Во соопштението, воениот портпарол на Хусите, Јахја Сари, рече: „За поддршка на угнетениот палестински народ и неговиот храбар отпор, нашите ракетни сили успешно го таргетираа аеродромот Бен Гурион во окупирана Јафа со хиперсонична ракета Палестина 2“.
Тој рече дека овој напад е „трет за 48 часа кој успешно ја постигна целта“.
Ова е петти пат ракета да биде лансирана од Јемен кон Израел по договорот за прекин на огнот на 19 јануари, кој Израел подоцна го прекрши.
Сари, исто така, ги предупреди сите авиокомпании дека „аеродромот Бен Гурион повеќе не е безбеден за воздушен сообраќај и ќе остане така додека не престане агресијата врз Газа и не се укине блокадата“.
„Како дел од нашиот одговор на американската агресија врз нашата земја, шести ден по ред, воздухопловните сили извршија воена операција насочена кон неколку воени бродови што го придружуваа носачот на авиони ‘УСС Хари Труман’ со повеќе дронови“, додаде тој.
Синоќа, израелската армија објави дека пресретнала проектил лансиран од Јемен пред да влезе во израелскиот воздушен простор, што е втор ваков инцидент во последните 24 часа.
Минатата недела американскиот претседател Доналд Трамп рече дека наредил „одлучен и моќен“ напад против Хусите.
Како одговор, Хусите во четвртокот нагласија дека заканите на Трамп „нема да ги одвратат од поддршката на Газа“, продолжувајќи со ракетните и нападите со дронови врз Израел и бродовите во Црвеното Море. Ова доаѓа заедно со обновениот напад на Израел врз Газа во вторникот.
До четвртокот вечерта, во американските воздушни напади врз Јемен загинаа 79 лица, а повредени беа над 100, меѓу кои и жени и деца, според изјавите на Хусите.
Хусити со проектили и беспилотни летала ги напаѓаат бродовите поврзани со Израел кои минуваат низ Црвеното и Арапското Море, Теснецот Баб ал-Мандаб и Аденскиот Залив од крајот на 2023 година, нарушувајќи ја глобалната трговија поради, како што порачаа, демонстрација на солидарност со Појасот Газа.
Хусите ги прекинаа своите напади кога беше прогласен прекин на огнот во јануари меѓу Израел и палестинската група Хамас, но се заканија дека ќе продолжат со нападите кога Израел ја блокираше сета хуманитарна помош во Газа на 2 март.
