Црвена полумесечина: Голем број тела на Палестинци пронајдени во северна Газа по повлекувањето на израелската Армија

АНКАРА (АА) - Голем број тела на Палестинци се пронајдени во северниот дел на Појасот Газа, откако израелската Армија се повлече од неколку области, јавува Анадолу.

Палестинската Црвена полумесечина соопшти дека одложеното извлекување на телата на Палестинците претставува ризик од болести и епидемии во северниот дел на Газа.

Се наведува дека спасувачките тимови се соочуваат со потешкотии во извлекувањето на телата од урнатините поради отсуството на потребната опрема.

„Има голем број тела на Палестинци во областите во северниот дел на Појасот Газа од каде што израелската Армија се повлече“, се додава.

Очевидци за Анадолу претходно денес изјавија дека неколку тела на Палестинци биле извлечени од улиците на кампот Џабалија и од областа на проектот Беит Лахија во северниот дел на Појасот Газа по повлекувањето на израелските сили.

Израелската Армија целосно се повлече од областа на кампот Џабалија и неговата околина по офанзивата што траеше 20 дена, јави дописникот на Анадолу.

Израел ја продолжува својата брутална офанзива врз Газа по нападот на Хамас на 7 октомври, и покрај резолуцијата на Советот за безбедност на Обединетите нации со која се бара итен прекин на огнот.

Оттогаш, повеќе од 36.200 Палестинци се убиени во Газа, огромно мнозинство се жени и деца, а речиси 81.800 се повредени, според локалните здравствени власти.

Речиси осум месеци по почетокот на израелската војна големи делови од Појасот Газа се во урнатини, и владее блокада на храна, чиста вода и лекови.

Израел е обвинет за геноцид пред Меѓународниот суд на правдата (МСП), кој во својата последна пресуда му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од еден милион раселени Палестинци побараа засолниште.