Aysu Biçer
27 Јуни 2025•Ажурирај: 02 Јули 2025
ЛОНДОН (АА) - Црномурестите деца приведени од полицијата во Лондон имаат 15 % поголема веројатност да бидат обвинети и да влезат во кривичниот систем во однос на нивните врсници белци за слични прекршоци, покажа нова студија, јавува Анадолу.
Студијата на Фондот за млади (YEF), спроведена во партнерство со Тимот за бихевиорален увид и Метрополитенската полиција, анализираше податоци што опфаќаат седум години и вклучуваат речиси 265.000 деца и млади кои дошле во контакт со полицијата во Лондон помеѓу 2015 и 2022 година.
Пренасочувањето - алтернатива на формалните кривични постапки за децата кои извршиле помали или првични прекршоци, или кои имаат низок ризик од повторување на прекршокот - покажа дека ја намалува веројатноста за идни прекршоци.
Новата анализа на Студијата на Фондот за млади (YEF) ги зајакнува тие докази, покажувајќи дека стапката на повторување на прекршокот во рок од шест месеци е речиси преполовена за децата кои се пренасочени (од 8,2 % на 4,5 %).
Кај децата вклучени во насилни прекршоци, повторниот прекршок се намалил за 59,8 %, а кај оние вклучени во криминал извршен со нож, намалувањето било 70 %.
„Овие резултати не покажуваат убедливо дека пренасочувањето предизвикува намалување на повторување на прекршокот“, предупредува извештајот, „но сепак ова се додава на растечкиот број докази за веројатната ефикасност на пренасочувањето како начин за спречување насилство“.
И покрај ветувачките наоди, извештајот прикажува загрижувачка слика за тоа како се применува пренасочувањето во практика. Тој нагласува дека резултатите можат остро да се разликуваат врз основа на тоа каде живее детето, неговиот претходен контакт со полицијата - и неговата раса.
Се покажа дека црномурестите деца имаат значително повисоки стапки на контакт со полицијата од нивните врсници белци, сочинувајќи 44,3 % од случаите и покрај тоа што претставуваат само 24,7 % од локалното население во текот на периодот на студијата.
Откако биле фатени од полицијата, црномурестите деца имале 14,8 % помала веројатност да бидат пренасочени од децата белци - дури и по контролата на видот на прекршокот, сериозноста и историјата на апсење.
Додека 59,5 % од децата белци кои биле фатени од полицијата биле пренасочени, само 50,7 % од црномурестите деца ја имале истата можност.
Д-р Стиви-Џејд Харди, помошник-директор за полициско работење и правда за млади во Студијата на Фондот за млади (YEF), изјави: „Кога се реализира добро и во соодветни околности, пренасочувањето на децата подалеку од кривичниот систем може да го намали повторувањето на делото. Но, огромните варијации во начинот на кој се спроведува значат дека не на секој млад човек му се дава можност да има корист од овој пристап. Треба да се осигуриме дека се спроведува ефикасно, доследно и праведно за да се заштитат децата од насилство.“
