ЛОНДОН (АА) – Шведска денес објави планови за распоредување воени ресурси, вклучително воени бродови, во НАТО-патролите на Балтичкото Море, по серијата сомнителни саботажи што ги зголемија безбедносните грижи во регионот, јавува Анадолу.

Шведската Влада откри дека ќе придонесе со три воени брода, извиднички авион АСЦ 890 и ресурси на крајбрежната стража за зајакнување на присуството на НАТО во областа.

Веднаш ќе бидат распоредени четири брода на крајбрежната стража, а седум ќе бидат ставени во состојба на готовност.

Ова го означува првиот придонес на Шведска со вооружени сили во одбранбените и одвраќачките напори на НАТО откако земјата се вклучи во Алијансата во март 2024 година.

Одлуката е донесена во услови на зголемени стравувања од активности на Русија на Балтикот, особено откако кабелот Естлинк-2, кој ги поврзува Финска и Естонија, беше оштетен за Божиќ.

Властите во двете земји се сомневаат дека оштетувањето е предизвикано од рускиот танкер за нафта Игл С, за кој се верува дека го влечел сидрото по морското дно.

Премиерот Улф Кристерсон, зборувајќи на годишната безбедносна конференција, ја опиша ранливата позиција на Шведска во променливиот геополитички пејзаж.

„Шведска не е во војна, но, исто така, нема ни мир“, изјави Кристерсон за новинската агенција TT.

Овој потег е во согласност со пошироката стратегија на НАТО за зајакнување на нејзиното воено присуство на Балтичкото Море, објавена од генералниот секретар Марк Руте во декември.

По одобрувањето од Туркије, Шведска и Финска се вклучија во Алијансата како одговор на руската инвазија на Украина, при што Шведска стана 32. членка на НАТО.