Шефицата на германската дипломатија: НАТО е сојуз со отворени врати

БЕРЛИН (АА) - Германската министерка за надворешни работи, Аналена Бербок, изјави дека НАТО е ориентиран кон одбраната и во исто време е сојуз на отворени врати, јавува Агенција Анадолија (AA).

Бербок во изјава за новинарите пред неформалниот состанок на министрите за надворешни работи на НАТО во Берлин, Германија, рече дека во овој момент на сите во Европа им е потребна поголема безбедност.

Таа додаде дека партнерите во НАТО јасно им ставиле до знаење на сите дека нивните врати сега се отворени за оние на кои им е потребна безбедносна поддршка.

„Тоа се нашите блиски пријатели и партнери Финска и Шведска“, рече Бербок, изразувајќи задоволство што министрите за надворешни работи на овие земји синоќа присуствуваа на настанот во НАТО.

Истакна дека Финска и Шведска се членки на Европската Унија (ЕУ) и дека не се дел од НАТО, но сега, како што рече, поради Русија овие две земји сакаат да влезат во НАТО.

„Во вакви моменти нашата врата е отворена. НАТО е и секогаш ќе биде одбранбено ориентиран сојуз, но исто така е и сојуз на отворени врати. Затоа ги поздравуваме Финска и Шведска доколку нивните парламенти и општества одлучат да влезат во НАТО“, рече Бербок.

Таа додаде дека Германија многу брзо ќе го одобри учеството на овие две земји во Алијансата и дека за ова прашање веќе разговарале со сите демократски партии во земјата.

„Како Германија и германска Влада, подготвивме сè за многу брз процес на одобрување“, рече таа.

Финска и Шведска имаат намера да станат членки на НАТО, што во моментов има 30 членки, од кои две се англо-американски и 28 европски.