Јапонската премиерка ќе го распушти Парламентот во петок за предвремени избори

ИСТАНБУЛ (АА) - Премиерката на Јапонија, Санае Такаичи, денес објави дека ќе го распушти Долниот дом на Парламентот на земјата за предвремени избори, јавува Анадолу.

На прес-конференцијата во Токио, Такаичи рече дека Парламентот ќе биде распуштен во петок, кога пратениците ќе се состанат на закажана седница.

Таа во октомври минатата година беше избрана за 104-ти премиер на земјата.

Изборите, првично закажани да се одржат најдоцна до октомври 2028 година, сега би можеле да се одржат веќе на 8 февруари.

На партијата или коалицијата ѝ се потребни најмалку 233 места во Долниот дом на дводомниот Парламент на Јапонија, кој брои 465 члена, за да избере премиер.