„Туркије го проширува своето присуство во вселената и покрај сите пречки“

ИСТАНБУЛ (АА) - Турскиот претседател Реџеп Таип Ердоган ова утро изјави дека и покрај пречките и ограничувањата, Туркије го проширува своето присуство во вселената, мислејќи на лансираниот домашен сателит Турксат 6А, известува Анадолу.

Првиот турски домашен комуникациски сателит Турксат 6А беше успешно лансиран од американската сојузна држава Флорида со ракетата Фалкон 9 на СпејсX.

Лансирањето се случи вчера во 19:30 часот по локално време од вселенската станица Кејп Канаверал.

Ердоган потсети дека Туркије пред две и пол години со иста ракета го лансираше и својот сателит Турксат 5Б.

„Задоволни сме што ја зајакнуваме соработката со Илон Маск и СпејсX на различни полиња“, рече Ердоган.

Тој рече дека Туркије има завршено повеќе од 81 % од потсистемите и софтверската работа од домашни извори за Турксат 6А, што е важно за иднината на земјата на полето на вселената.

Претседателот Ердоган потсети и дека Туркије неодамна го извела своето прво вселенско патување со екипаж, како дел од националната вселенска програма.

„Туркије со Турсат 6А дојде до нова фаза во производството на сателити“, рече Ердоган.

Турксат 6А ќе овозможи да се зголеми извозот на услугите на новата платформа, а Туркије ќе им се приклучи на земјите способни да произведуваат свои комуникациски сателити.

Ердоган, исто така, рече дека е значајно тоа што Туркије може да произведува критични комуникациски сателити без да зависи од странски земји.

Турксат 6А е прв геостационарен комуникациски сателит што го изгради Туркије, а проектот го водеа Турскиот институт за истражување на вселенска технологија при Институтот за научни и технолошки истражувања и компанијата „Туркиш Аероспејс Индустрис“.

Сателитот тежок 4,25 тони ќе биде поставен на орбитална позиција од 42 степени источно, а неговиот животен век во орбитата ќе биде 15 години.