Акар: „Кипар е национална цел на Турција“

АНКАРА

Турскиот министер за одбрана, Хулуси Акар, изјави дека кипарското прашање е национална цел на Турција и цел на Анкара да создаде траен мир и благосостојба во регионот, јавува Агенција Анадолија (АА).

„Кипар, Кипарците се наши браќа, ние сме подготвени да сториме сѐ што е потребно за да ги заштитиме правата и интересите на нашите кипарски браќа таму“, рече Хулуси Акар на приемот на Денот на вооружените сили на Турската Република Северен Кипар (ТРСК) во Анкара.

Акар рече дека активностите за дупчење во лиценцирани области во Источниот Медитеран се во рамките на правата на Турција и потврди дека Анкара го користи и ќе го користи ова право. „Како Турција и Турска Република Северен Кипар со нашите браќа таму, продолжуваме и ќе ја продолжиме нашата работа во согласност со нашите права и меѓународното право“, рече Акар.

Тој повтори дека какво било предложено решение за Кипар и Источен Медитеран, што не ги вклучува Турција и Турската Република Северен Кипар, би било залудно, и истакна дека Турција ќе продолжи да ги поддржува кипарските Турци, како што тоа го правела и досега.

Турција е земја гарант за Турската Република Северен Кипар и постојано го оспорува едностраното дупчење на кипарската администрација на Јужен Кипар во Источниот Медитеран, тврдејќи дека ТРСК исто така има права на ресурсите во областа.

Во 1974 година, по пучот кој имаше за цел анектирање на Кипар од страна на Грција, Анкара интервенираше како земја гарант. Во 1983 година беше основана Турската Република Северен Кипар.

Со децении се појавуваа неколку обиди за решавање на кипарскиот спор, но завршуваа со неуспех. Последниот одржан во 2017 година во Швајцарија со учество на земјите гаранти - Турција, Грција и Велика Британија - исто така заврши без напредок.