Ердоган: „650.000 нови домови ќе бидат изградени во зоната погодена од земјотресот во Туркије“

АНКАРА (АА) - Турскиот претседател, Реџеп Таип Ердоган, денес изјави дека околу 650.000 нови домови ќе бидат изградени во турските региони кои неодамна беа погодени од силни земјотреси, јавува Анадолу.

Ердоган рече дека светиот муслимански месец Рамазан поминал со тешко срце во Туркије поради загубите во земјотресите на 6 февруари, и додаде: „Ние ги лекуваме раните од катастрофата на векот со солидарноста на векот.”

„Планираме да изградиме 650.000 нови домови, од кои 507.000 станови и 143.000 рурални куќи, во зоната на земјотресот. Ќе доставиме 319.000 од нив на нивните сопственици во рок од една година“, рече Ердоган во пораката по повод почетокот на рамазанскиот Бајрам.

Ердоган рече дека поголемиот дел од урнатините од земјотресите се исчистени и дека е започнат процесот на изградба на над 100.000 станови и рурални куќи по катастрофата.

„Како што се отстрануваат трагите од земјотресите, животот во регионот постепено се враќа во својот нормален ритам“, додаде тој.

„Веруваме дека по Бајрам, враќањето во регионот, вклучително и во нашите градови погодени од земјотресот, ќе се забрза со отворањето на училиштата. Иако не можеме да ги вратиме загубите, решени сме да им предадеме нови домови на нашите браќа и сестри погодени од земјотресот што е можно поскоро“, додаде тој.

Осврнувајќи се на општите и претседателските избори следниот месец, на кои ќе учествува за нов мандат, Ердоган рече: „Ние ќе ги завршиме изборите на 14 мај со поддршка на нашата нација и ќе обезбедиме реконструкцијата и заживувањето во зоната на земјотресот да продолжи непречено.“

„Очекуваме секој поединец од 85-те милиони, особено нашата младина, да застане со нас во оваа света и предизвикувачка борба“, рече тој.

„Веруваме дека нашата нација повторно ќе ги фаворизира делата пред зборовите, делувањето пред реториката, услугите наместо манипулациите. Однапред им благодарам на сите мои граѓани кои ја бранат нашата визија за „Векот на Туркије“ и нè поддржуваат со своите молитви“, додаде тој.

На 6 февруари земјотреси со јачина од 7,7 и 7,6 степени по Рихтер погодија голем број турски области, одземајќи над 50.000 животи.

Околу 14 милиони луѓе во Туркије се погодени од земјотресите, како и многу други во северна Сирија.