Ердоган: „За БиХ ќе испратиме 30.000 дози вакцини против Ковид-19“

АНКАРА (АА) - Турскиот претседател Реџеп Таип Ердоган изјави дека Турција ќе донира 30.000 дози вакцини против Ковид-19 на Босна и Херцеговина, јавува Агенција Анадолија (АА).

„Ние ќе испратиме 30.000 дози вакцини против Ковид-19 во Босна и Херцеговина“, рече Ердоган по состанокот со членовите на Претседателството на БиХ кои престојуваат во официјална посета на Анкара.

Тој напомена дека е многу важно да се продолжи со понатамошно развивање на економските односи меѓу двете земји.

„Нашата цел е да го зголемиме обемот на трговска размена меѓу Босна и Херцеговина и Турција на една милијарда долари“, рече турскиот претседател.

Коментирајќи го обновувањето на дипломатските односи меѓу Турција и Египет, Ердоган истакна дека Турција нема проблем со народот на Египет.

„Египетскиот народ не е против нас“, нагласи турскиот претседател.

Тој се осврна и на случувањата во Источниот Медитеран, изразувајќи надеж дека тоа прашање ќе биде решено.

„Турција таму има позиција на донесувач на одлуки и да се надеваме дека тој процес ќе биде решен по нормален пат. Преданоста на Турција по тоа прашање продолжува. Значи, нема збор за тоа да правиме отстапки“, рече Ердоган.

Претседавачот и членовите на Претседателството на Босна и Херцеговина, Милорад Додик, Шефик Џаферовиќ и Жељко Комшиќ престојуваат во официјална посета на Турција.

За време на нивната посета на Анкара, членовите на Претседателството на БиХ се состанаа и со претседателот на Големото народно собрание на Република Турција, Мустафа Шентоп.

Официјалните претставници на Босна и Херцеговина и на Турција денес во текот на официјалната посета потпишаа договори за соработка во инфраструктурни и градежни проекти и за заемно признавање и размена на возачки дозволи, како и меморандум за соработка во промоција на инвестициите.