Abdulselam Durdak
04 Декември 2023•Ажурирај: 05 Декември 2023
ИСТАНБУЛ (АА) - Меѓународниот стартап самит, „Take Off“, годинава по шести пат ќе ги собере претприемачите, инвеститорите, менторите и сите учесници во претприемачкиот екосистем, јавува Анадолу.
Самитот, чиј партнер за глобална комуникација е Анадолу, ќе се одржи од 5 до 6 декември во Конгресниот центар „Лутфи Кирдар“, додека регистрацијата продолжува за оние кои сакаат да учествуваат на самитот.
На самитот, каде што ќе се натпреваруваат многу различни иновативни иницијативи, вклучувајќи услуги, медицинско-здравствена заштита, автомобилска индустрија, авијација, логистика, енергетика, бизнис-менаџмент, финансии и банкарство, дигитален маркетинг, автоматизација на податоци, игри, вештачка интелигенција, роботика, нослива технологија, образование, земјоделски технологии, заштита од природни катастрофи, претприемачите ќе имаат можност да се сретнат со повеќе од 100 инвеститори и да ги споделат своите идеи.
Иницијативите кои ќе се квалификуваат во финалето ќе добијат големи награди. Самитот им нуди можност на претприемачите да креираат компании и да ги претворат своите потфати во успешни приказни со можност за меѓународно вмрежување.
Во меѓувреме, посетителите ги очекуваат возбудливи содржини и ќе имаат можност да пробаат различни производи на штандовите на претприемачите, засегнатите страни и компаниите спонзори на самитот.
Поранешниот шеф на Меѓународната астрономска федерација, Жан-Ив ле Гал, извршниот директор на Хиџра груп, Дима Џани, основачот и директор на Лабораторијата за роботика за одржливост EMPA, Мирко Ковач, коосновачот и извршен директор на „Инсајдер“, Ханде Чилингир, основачот на „Фарклабс“, Аху Сертер, ќе присуствуваат на самитот, а дел од самитот „Take Off“ ќе биде и генералниот директор на Мајкрософт Туркије, Левент Озбилгин.
Самитот првпат беше организиран во 2018 година, додека оваа година ќе овозможи уникатно искуство за претприемачите, инвеститорите, ентузијастите на претприемништвото и технологијата два последователни дена.
Пријавувањето за настанот, на кој учеството е отворено за сите и бесплатно, се врши преку веб-страницата „https://mth.tc/takeoff2023“.
Самитот, организиран во соработка со 43 институции под раководство на Фондацијата „Турски технолошки тим“, Министерството за индустрија и технологија и Одделот за инвестиции при турското Претседателство, има за цел да ги претвори соништата на претприемачите во реалност.
