Muhammed Enes Çallı
14 Декември 2023•Ажурирај: 14 Декември 2023
ИСТАНБУЛ (АА) - Министерот за надворешни работи на Туркије, Хакан Фидан, истакна дека Анкара ги поздравува тековните мировни преговори меѓу Азербејџан и Ерменија, додавајќи дека можноста за мир значително е зголемена и сега е неизбежна, јавува Анадолу.
Фидан го истакна ова за време на заедничката прес-конференција со министерот за надворешни работи на Азербејџан, Џејхун Бајрамов, во азербејџанскиот главен град Баку.
„Го поздравуваме позитивниот напредок на договорите за постојан мир и одредувањето на границата меѓу Азербејџан и Ерменија“, рече Фидан.
Според него, можноста за мир значително е зголемена и сега е неизбежна.
Тој го изрази своето задоволство од неодамнешната одлука на Азербејџан и Ерменија да преземат конкретни мерки за градење доверба.
„Се надеваме дека ваквите чекори ќе продолжат и ќе го отворат патот за сеопфатен мировен договор“, додаде тој.
Фидан, исто така, рече дека импулсот во мировните преговори меѓу Азербејџан и Ерменија ќе помогне во нормализирањето на односите меѓу Анкара и Ереван.
Тој му честиташе на Азербејџан за воспоставувањето контрола и суверенитет над Карабах преку антитерористичката операција во септември оваа година.
Според него, стабилноста во Јужен Кавказ е клучна за безбедноста на транспортот и енергетските цевководи.
„Мора да ги решиме можностите и ризиците во енергетскиот сектор со сеопфатна стратегија заснована врз нашите заеднички интереси. Проширувањето на капацитетот на ТАНАП и трансферот на каспискиот природен гас во Туркије и Европа се клучни елементи на нашата стратегија“, нагласи Фидан.
Шефот на турската дипломатија рече дека мирен и спокоен Јужен Кавказ е во интерес на сите актери и дека сите страни треба да работат на создавање клима на мир и нормализација.
„За жал, ерменската дијаспора на Запад ги искористува тешките услови со кои се соочува ерменскиот народ“, истакна тој.
Фидан нагласи дека ерменската дијаспора се обидува да поттикне одредени земји против Азербејџан.
„Посоодветно би било напорите да се насочат кон создавање средина каде што ерменскиот народ ќе може да воспостави нормални односи со своите соседи наместо да се справува со овие провокации“, додаде министерот за надворешни работи на Туркије.
