Членовите на 28. состав на турското Собрание положија заклетва

АНКАРА (АА) - Членовите на новиот 28. состав на Големото народно собрание на Република Туркије (ТБММ) синоќа ја положија свечената заклетва и ги презедоа мандатите, а на почетокот на церемонијата присуствуваше и претседателот на Туркије, Реџеп Таип Ердоган, известува Анадолу.

Парламентарните избори во Туркије се одржаа на 14 мај, а Врховната изборна комисија пред три дена и официјално ги објави конечните резултати од изборите.

Лидерот на партијата на национално движење (МХП), Девлет Бахчели (75), претседаваше со седницата како најстар пратеник во Парламентот. Присутните во салата му оддадоа почит на основачот на Републиката, Кемал Ататурк, а прв заклетва положи Бахчели.

Претседателот на Туркије, Реџеп Таип Ердоган, присуствуваше на првиот дел од свечената седница, а полагањето заклетви траеше со часови.

Победник на изборите што се одржаа на 14 мај е Партијата за правда и развој (АК партија), чиј лидер е Ердоган, освојувајќи вкупно 268 места во Парламентот.

Партијата на национално движење (МХП), коалицискиот партнер на АК Партијата, освои 50 места, а Партијата на повторна благосостојба (YRP) освои 5 пратенички места, обезбедувајќи заедничко мнозинство од 323 места во турскиот Парламент, кој го сочинуваат 600 пратеници.

Со 169 пратеници, Републиканската народна партија (ЏХП), заедно со нејзиниот коалициски партнер Партијата ИЈИ (IYI), обезбедија вкупно 212 места во Парламентот, претставувајќи ја главната опозициска Национална алијанса.

Останатите 65 места во Парламентот ги освои Алијансата за труд и слобода, составена од Партијата на зелената левица со 61 место и Работничката партија на Туркије со четири пратенички места.