АНТАЛИЈА (АА) - На 8-миот состанок на Генералното собрание на Парламентарното собрание на Процесот за соработка во Југоисточна Европа (ПС ПСЈИЕ), одржан под мандат на претседателството на Турција, беше истакнато дека треба да се зајакнат односите меѓу земјите, јавува Агенција Анадолија (АА).
Претседателите на парламентите на земјите учеснички имаа свои обраќања на 8-то Генерално собрание на ПС на ПСЈИЕ, чиј домаќин беше Мустафа Шентоп, претседателот на Големото национално собрание на Турција. Состанокот се одржа во хотел во туристичкиот комплекс Белек, Анталија.
Талат Џафери, претседателот на Парламентот на Северна Македонија, во своето обраќање рече дека се работи на зајакнување на односите меѓу соседните земји од Југоисточна Европа.
Зборувајќи дека направени се чекори кон раст на мирот, безбедноста и соработката во регионот, Џафери истакна: „Тука одредивме заеднички стратегии и за регионот и за нашиот глобален бизнис. Стабилноста на регионот, безбедноста на нашите граници и нарушувањето на територијалниот интегритет се под постојана закана. Миграциите се одговорност на сите нас, не само на една држава. Со нашата искрена соработка, отворен дијалог и разумни решенија за конфликтите, можеме да одиме напред без да предизвикаме нови конфликти.“
Претседателот на Парламентот на Црна Гора, Алекса Бечиќ, во своето обраќање рече дека Турција е домаќин на важна организација.
Изјавувајќи дека земјите минале низ тежок процес поради пандемијата на новиот тип коронавирус (Ковид-19), Бечиќ рече: „Во време на процесот на епидемија, Турција и на нас и на другите земји ни обезбеди голема помош по прашањето на медицинската помош. Многу ѝ се заблагодарувам на Турција за помошта.“
Нагласувајќи дека треба да се преземат искрени чекори за зајакнување на врската меѓу земјите, Бечиќ истакна дека грешките треба да се остават во минатото и да се работи на студии за иднината.
На состанокот присуствуваа и Василика Хиси, заменик-претседателката на албанскиот Парламент, и пратеници од Хрватска, Косово, Црна Гора, Северна Македонија и Босна и Херцеговина. Покрај тоа, некои пратеници од Србија, Словенија и Грција на состанокот учествуваа преку интернет.
