Australia: Kina të kërkojë falje për postimin e diskutueshëm në Twitter

Australia tha se Kina duhet të kërkojë falje për një postim në Twitter që sulmon ushtrinë australiane pas hetimit të madh për krime lufte që zbuloi vrasjen e dhjetëra civilëve afganë, transmeton Anadolu Agency (AA).

"Australia po kërkon një falje nga Qeveria Kineze për këtë postim mizor", citohet të ketë thënë kryeministri Scott Morrison për ABC News, duke shtuar: "Ne gjithashtu kërkojmë heqjen e tij menjëherë".

Ai pranoi se tensionet ekzistonin midis Kinës dhe Australisë, por vlerësoi se "kjo nuk është mënyra për t'i zbutur tensionet".

Ministrja e Jashtme e Australisë, Marise Payne, e përshkroi postimin si rastin më "të egër" të dezinformimit të mediave sociale që kishte parë në karrierën e saj.

"Qeveria Australiane ka thirrur ambasadorin kinez dhe ka kërkuar kërkimfalje nga ambasadori në lidhje me këtë postim", tha ajo, duke shtuar: "Ne gjithashtu do ta përcjellim këtë mesazh direkt në Pekin përmes ambasadorit tonë".

Zëdhënësi i Ministrisë së Punëve të Jashtme (MPJ) kineze, Zhao Lijian, sot ndau imazhin që me sa duket përshkruante një ushtar australian duke vrarë një fëmijë afgan.

"Të tronditur nga vrasja e civilëve dhe të burgosurve afganë nga ushtarët australianë. Ne i dënojmë ashpër veprimet e tilla dhe bëjmë thirrje që ata të japin llogari", shkroi Zhao.

Zëdhënësi i MPJ-së kineze gjithashtu "dënoi fuqishëm" veprimet e ushtarëve australianë javën e kaluar, duke thënë se raporti "ekspozoi plotësisht hipokrizinë e të drejtave të njeriut dhe lirisë në të cilën thirren vendet perëndimore".

Zyrtarët afganë, si dhe vende të tjera përfshirë Turqinë, gjithashtu kanë kritikuar vrasjet e zbuluara në hetimin e fundit më 19 nëntor për të paktën 39 incidente të vrasjes së civilëve në Afganistan nga forcat speciale australiane.

Raporti i Brereton-it, i porositur nga inspektori i përgjithshëm i Forcës Australiane të Mbrojtjes, gjeti "informacion të besueshëm" se ushtarët australianë vranë civilë dhe të burgosur në Afganistan.

Marrëdhëniet midis Pekinit dhe Canberra-s u përkeqësuan pasi Australia iu bashkua aleatëve të saj perëndimorë për të kërkuar hetim për origjinën e COVID-19, i cili u shfaq për herë të parë në Wuhan të Kinës më dhjetor 2019.