Francë, konfirmohen 33 raste të lisë së majmunit

Agjencia franceze për shëndet publik njoftoi sot se janë konfirmuar 33 raste të virusit të lisë së majmunit në Francë, transmeton Anadolu Agency (AA).

Që nga e hëna, kur u konfirmuan 17 raste, numri i të infektuarve pothuajse është dyfishuar.

“Që nga 1 qershori, 24 raste janë raportuar në rajonin parisien të Ile-de-France, dy në Auvergne-Rhone-Alpes, katër në Occitanie dhe nga një në Haut-de-France, Centre-Val-de-Loire dhe Normandi", njoftoi Agjencia e shëndetit publik.

Ministrja e Shëndetësisë, Brigitte Bourguignon tha se nuk ka frikë nga një shpërthim sepse ka mjaft vaksina për të parandaluar përhapjen e virusit.

Franca ka filluar vaksinimin e personave që janë në kontakt me pacientë të infektuar dhe për punonjësit e shëndetësisë që trajtojnë personat e infektuar.

Franca zbuloi rastin e parë të lisë së majmunëve në rajonin e Parisit më 20 maj.

Lija është një virus që transmetohet te njerëzit nga kafshët dhe simptomat përfshijnë ethe, skuqje dhe ënjtje të nyjeve limfatike.