Izraeli arreston 12 palestinezë në Bregun Perëndimor

KUDS (AA) - Ushtarët izraelitë kanë arrestuar 12 palestinezë në Bregun Perëndimor të pushtuar, transmeton Anadolu Agency (AA).

Në një deklaratë me shkrim nga ushtria izraelite thuhet se në operacionet e mbrëmshme në Bregun Perëndimor 12 palestinezë janë arrestuar në shtëpitë e tyre, nën akuzën për "pjesëmarrje në aktivitete terroriste".

Në deklaratë thuhet se palestinezët janë dërguar në qendra të paraburgimit për t’u marrë në pyetje.

Ushtria izraelite shpesh kryen arrestime në Bregun Perëndimor dhe Kudsin Lindor nën pushtim dhe arreston palestinezët me pretendime të ndryshme.

Sipas të dhënave nga burimet zyrtare palestineze në burgjet e Izraelit ndodhen rreth 6.500 palestinezë në mesin e të cilëve gra dhe fëmijë.

Izraeli zbaton praktikën e ashtuquajtur "burgim administrativ", përmes së cilës privon palestinezët nga liria nga një deri në gjashtë muaj, duke u bazuar në informacione të shërbimit informativ.

Ky lloj burgimi mund të zgjatet madje deri në 5 vite me vendim të gjykatësit ushtarak pa ngritur aktakuzë, në rast se merret vendim që personi i burgosur "përbën kërcënim për sigurinë e Izraelit".