Putin uron Biden-in për fitoren në zgjedhje

Presidenti i Rusisë, Vladimir Putin, uroi presidentin e zgjedhur të SHBA-së, Joe Biden, për fitoren e zgjedhjeve, transmeton Anadolu Agency (AA).

Në një telegram të publikuar në faqen e internetit të Kremlinit, Putin i uroi Biden-it "çdo sukses" dhe shprehu besimin se Moska dhe Washingtoni mund të kontribuojnë në zgjidhjen e problemeve dhe sfidave me të cilat përballet bota pavarësisht nga dallimet e tyre, pasi të dy vendet "mbajnë përgjegjësi të veçantë për sigurinë dhe stabilitetin global".

"Me këtë ide, bashkëpunimi ruso-amerikan i bazuar në parimet e barazisë dhe respektit të ndërsjellë do të përmbushte interesat e popujve të të dy vendeve dhe të gjithë komunitetit ndërkombëtar", thuhet në telegram.

Presidenti rus gjithashtu shprehu gatishmërinë e tij për bashkëpunim dhe kontakt me Biden-in.