Muhammet Kurşun
16 Sibat 2017•Rojanekirin: 16 Sibat 2017
ANKARA
Serokê Herêma Kurdistana Iraqê Mesûd Barzanî ji bo beşdariya 53emîn Konferansa Ewlehiyê li Munîha Almanyayê ket rê.
Li gor daxuyaniya malpera resmî ya Serokatiyê Barzanî bi heyeta ku ji berpirsên siyasî û eskerî pêk tê ji Balafirgeha Hewlêrê ya Navneteweyî birê ket.
Di heyeta Barzanî de Sekreterê Giştî yê Partiya Sosyalîst a Demokrat Mihemed Hacî Mehmûd, Endamê Polîtburoya YNKê Şêx Cafer Şêx Mistefa, Endamê Polîtboruya PDKê Umer Osman, Serokê Dîwana Serokatiyê Fûad Huseyn, Berpirsê Têkiliyên Derve yê PDKê Hêmin Hewramî û Cîgirê Wezîrê Pêşmerge Enwer Hacî Osman hene.
Organîzasyona li Munîhê ku dê 17 û 19ê Sibatê bi beşdariya 500 mêvanî ji 60 welatan birêve biçe, mijarên ewlehiya cihanî û şerê li dijî terorê ji xwe re dike rojev.
Ji 60 welatî 500 serokdewlet, serokwezîr, wezîr û nûnerên hikûmetan beşdarî vê civînê dibin.
Ji xeynî Serokê Herêma Kurdistanê Mesûd Barzanî, Wezîrê Derve yê Tirkiyê Mevlut Çavuşoglu jî di nav dawetiyan de ye.
Tê çaverêkirin ku Barzanî bi gelek serok û berpirsên welatan re dîdaran bike.
Herwiha kesên wek Sekreterê Giştî yê NYê Antonio Guterres, Serokê Konseya Ewropayê Donald Tusk, Berpirsa Têkiliyên Derve û Bergiriyê ya Yekîtiya Ewropayê Federica Mogherini, Sekreterê Giştî yê NATOyê Jens Stoltenberg, Serokê Dewleta Polonyayê Andrzej Duda, Serokê Dewleta Ûkraynayê Petro Poroschenko, Serokê Dewleta Efxanistanê Mohammad Ashraf Ghani, Serokwezîra Norwecê Erna Solberg, Serokwezîrê Macaristanê Victor Orbán, Serokwezîrê Iraqê Heyder el-Ebadî, Wezîrê Derve yê Komara Çînê Wang Yi, Wezîrê Derve yê Siûdiyê Adil el-Cubeyr, Wezîrê Derve yê Îranê Mûhemmed Cewad Zerîf, Wezîrê Derve yê Rûsyayê Sergey Lavrov, Wezîre Derve yê Fransayê, Jean-Marc Ayrault, Wezîrê Derve yê Ingîlereyê Boris Johnson, Sererkanê Pakistanê Qamar Javed Bajwa, Wezîrê Bergiriyê yê Îsraîlê Avigdor Liberman, Serokê Komîteya Xaça Sor a Navneteweyî Peter Maurer, Dîrektorê Çavdêriya Heqê Însanî (Human Rights Watch) Kenneth Roth, Serokê Microsoft/Bill & Melinda Gates Foundation Bill Gates, hunermend Philanthrop Bono jî di nav lîsteya dawetiyan de hene.
