Ji Amerîkayê li ser Qeterê daxuyanî

WASHINGTON

Wezareta Karên Derva ya Amerîkayê ragihand, di mijara astengkirina fînansmanê terorê da Qeter gelekî pêş ket, lêbelê hê gelek kar û bar hewce dikin.

Berdevkê Wezaretê Heather Nauert piştî ku dest bi wezîfeyê kir, cara ewil derket pêşiya rojnamegeran û pirsên li ser rojevê bersivandin.

Nauert li ser krîza navbera Qeter û hin welatên ereban sekinî û wiha dewam kir: "Qeter li ser pereyê şikbar lêkolîna hiqûqî dike, mal û milkan radigire û pergala kontrola bankeyan çêkiriye. Qeter di mijara astengkirina fînansmanê terorê da hewlên cidî nîşan da, em vê dibînin. Pêşketin çêbû, lêbelê hê gelek kar û bar hewce dikin."

Nauert diyar kir, têkiliya Amerîka û Qeterê xurt e û wiha dewam kir: "Bi Qeterê ra têkiliyeke me ya xurt heye. Bi Qeterê ra û bi welatên din ên li herêmê ra em li dijî terorê tevkariya xwe didomînin."

Berdevk Nauert got ku divê hemû welatên herêmê piştgiriya xwe ya ji bo teror û tundrawiyê bi dawî bikin.

Her wiha Nauert diyar kir ku welatên ku li dijî Qeterê hewl dan, berî hewildanê Amerîka agahdar kirin.