Fatih Gazioğlu
27 Nîsan 2019•Rojanekirin: 28 Nîsan 2019
Serokomarê Tirkiyeyê û Serokê Giştî yê AK Partiyê Recep Tayyîp Erdogan wiha got: "Her hilbijartin wesîleya îmtihan, têkoşîn û mihasebeyê ye. Me di hilbijartina 31ê adarê da îmtihan bi serkeftî da."
Serokomar Erdogan li Kizilcahamê beşdarî civîna Nirxandin û Îstîşareya AK Partiyê ya 28emîn bû.
Serokomar li ser encamên hilbijartinê herêmî axivî û wiha got:"Em ê vê meydanê ji wan kesên keysperest ên ku li çar aliyî di kozikan da xwe veşartine û dixwazin tîrên xwe yên bijehr di partiye me da bikin ra nehêlin. Her hilbijartin wesîleya îmtihan, têkoşîn mihasebeyê ye. Me di hilbijartina 31ê adarê da îmtihan bi serkeftî da. Me wek AK Partî li welêt ji sedî 44,4 ray sitand. Ev reqem di hilbijartinên herêmî yên ku em wek AK Partî beşdar bûnê da rêjeya herî zêde ya duyemîn e. Miletê me ji hezar û 389 şaredariyên li welêt 758 heb emanetî kadroyên AK Partiyê kirin."
Serokomar Erdogan di axaftina xwe da behsa hilbijartina Şaredariya Bajarê Mezin a Stenbolê ya bi destê LHByê tê nirxandin jî kir û got ew pêvajoyê ji nêz va dişopînin.
- "Ez eşkere bibêjim, heta dûmahiyê em ê têkoşîna xwe ya hiqûqî bidomînin"
Serokomar di pevajoya hilbijartina Stenbolê da nêrîna CHPyê jî rexne kir û wiha axivî:"Pevajoya li ser hilbijartina Şaredariya Bajarê Mezin a Stenbolê ya bi destê LHByê tê nirxandin em teqîb dikin û em ê bikin jî. Me bi reyên ku di qanûna me ya hilbijartinê da cî hene îtiraz kir. Niha CHP ji ber vê bi uslubeke bêedeb êrîşî me dike. Ev tiştekî trajîkomîk e. Li vê derê organîzasyoneke rêxistinî ya mezin heye. Belgeyên di destê me da vê nîşan didin. Niha tiştekî wiha tê gotin. Dibêjin 'Tu hêviya AK Partiyê nemaye.' Ez eşkere bibêjim, heta dûmahiyê em ê têkoşîna xwe ya hiqûqî bidomînin. Gelê me dibêje 'Ev hilbijartina Stenbolê çênebû, teqez şaîbeyek tê de heye û divê ev şaîbe ji holê bê rakirin ku dilê me jî rehet bibe. Ji encumenan 5 hatine hilbijartin û 5 jî hatine tayînkirin yek lê zêde jî serokê şaredariyê. Lê ez vê yekê li gorî demokrasiyê nabînim lewra demokrasî cihekî ku kesên hatine hilbijartin lê serdest in, ne yên hatine tayînkirin. Ji bo hilbijartinên herêmî divê em di parlementoyê da li ser verastkirinekê bisekinin û vê yekê binirxînin."
Serokomar Erdogan destnîşan kir ku ew kesên ku li hemberî wan û cem wan sekinîne tu carî ji bîr nakin û wiha dewam kir:"Ew kesên digotin em merivên vê dozê ne, di dema pevajoya hilbijartinan de li ku derê bûn? Ev merivana çûn ku derê? Em di heyamên wiha da kesên li hemberî me disekinin û kesên li cem me disekinin ji bîr nakin. Kar û xebatên hin kesên ku di nav me da heta astekê hatine û gihîştine mertebeyekê bi tu awayî nayê qebûlkirin û pejirandin. Kesên ji exlaqê vê teşkîlatê bêpar in wê tu carî nikaribin qala xwe bikin. Bizanibin ku vê teşkîlatê li Enqereyê xwe nekişandiye nav qalikê xwe û yeke wisa jî nîne. Li kîjan bajarî, li kîjan navçeyî çi diqewime hemû ji me ra tên. Em zanin li ku derê çi diqewime. Kesên ku pişta xwe dane rêxistinên terorê nikarin me fehm bikin. Yên ku îqbala xwe di muhendisya siyasetê de dibînin neşên me îdrak bikin. Yên ku figuraniya senaryoyayên dijî Tirkiyeyê dikin têkoşîna me nikarin fehm bikin. Kesên ku li gorî berê bagerê cî diguherin û li koşkên xwe rûdinin şerê ku em didin neşên me fehm bikin."
- "Tehcîra Ermeniyan ne ferman e û ne jî felaket e"
Serokomar Erdogan li ser tehcîra Ermeniyan jî got ev bûyerek e ku sedsa berê qewimiye û wiha got: "Tehcîra Ermeniyan ne ferman e û ne jî felaket e. Ev bûyereke sedsal berê ye di nav şert û mercên pir bi êş da qewimiye. Heke bi awayê tê îdiakirin ku me li hemberî Ermeniyan bûyereke wisa bikira îro kesî nikaribû qala bi milyonan Ermeniyên ji Ewropayê bigir heta Amerîkayê, ji Afrîkaya Bakur bigir heta Qafqasyayê belav bûne û dijîn, bikira."
