نرخی هەر دۆلارێکی ئەمریکا لە بازاڕەکانی عێراق لە هەزار و ٦٠٠ دینار نزیک بوویەوە

نرخی هەر دۆلارێکی ئەمریکا لە بازاڕەکانی ئازاد لە عێراقدا لە هەزار و ٦٠٠ دینار نزیک بوویەوە.

بەهای دراوی نیشتمانی عێراق بەرامبەر دۆلار ئەمڕۆ جارێکی دیکە دابەزی و ١٠٠ دۆلار بە ١٥٩ هەزار و ٢٥٠ دینار مامەڵەی پێوە کرا.

ئەوە لە کاتێکدا نرخی فەرمی بانکی ناوەندی عێراق بۆ هەر دۆلارێک، هەزار و ٣٢٠ دیناری عێراقی دانراوە.

٣٠ی ئەیلوول وەک دوا وادە بۆ کشانەوەی هێزەکانی هاوپەیمانان لە عێراق و هەروەها چۆنییەتی مامەڵەکردن لەگەڵ گرووپە چەکدارەکان لەو وڵاتە، بووەتە هۆی نیگەرانی و شارەزایان کڕینی دۆلاری زیاتر لە لایەن هاووڵاتیان، بە هۆکاری داشکانی دینار بەرامبەر بە دۆلاری دەزانن.

هاوکات نرخی فرۆشتنی مسقاڵێک زێڕی عەیار ٢٢ بە یەک ملیۆن و ٢٥ هەزار دینار، زێڕی عەیار ٢١ بە ٩٨٠ هەزار، زێڕی عەیار ١٨ بە ٨٤٠ هەزار و زێڕی عەیار ١٤ بە ٦٥٢ هەزار دینار مامەڵەی پێوەکرا.