رێككەوتننامەى نێوان توركيا و رووسيا سەبارەت بە سووريا واژوو کرا

ئەنقەرە ـ AA

لە رێککەوتننامەکەدا کە لە ١٠ خاڵ پێکھاتووە تێدا نووسراوە کە سەرکۆماری تورکیا، رەجەب تەیب ئەردۆغان و سەرۆکی رووسیا، ڤیلادیمیر پوتین لەسەر ئەم بابەتانەی خوارەوە رێککەوتوون.

ماددەکانی رێککەوتننامەکە:

ـ ھەردوولا پەیوەستن بە پشتگیری لە پاراستنی یەکپارچەیی خاک و یەکێتی سیاسیی سووریا و پاراستنی ئاسایشی نیشتیمانیی تورکیا .
ـ جەخت لەسەر سووربوونیان بۆ بەرەنگاربوونەوەی تیرۆریزم بە ھەموو جۆر و شێوازەکانی و پوچەڵ کردنەوەی ئەجیندا جووداخوازییەکان لە خاکی سووریادا کردەوە.
ـ لەم چوارچێوەیەدا، ناوچەکانی ئۆپەراسیۆنی کانی ئاشتی لە نێویاندا سەرێ کانی و تەل ئەبیەز (گرێ سپی) و لە قوڵایی ٣٢ کلم وەکو دۆخی ئێستای دەمێنێتەوە.
ـ ھەردوولا جەخت لەسەر گرنگی رێککەوتننامەی ئەدەنە دەکەنەوە. رووسیا دەبێت بەو دۆخەی ئێستا کارئاسانی بۆ جێبەجێکردنی رێککەوتننامەی ئەدەنە بکات.
ـ لە رێککەوتی ٢٣-ی تشرینی یەکەم کاتژمێر ١٢-ی نیوەڕۆوە، پۆلیسی سەربازی رووسیا و پاسەوانی سنووری سووریا ئەرکی دەرکردنی ئەندامەکانی یەپەگە و چەکەکانیان لە ناوچەکانی دەرەوەی ئۆپەراسیۆنی کانی ئاشتی لە بەری سووریای سنووری تورکیا سووریا بۆ قوڵایی٣٠ کلم لە سەر سنووری سووریا- تورکیا-وە دەگرنە ئەستۆ. ئەم کارە لە ماوەی ١٥٠ کاتژمێر دەبێت کۆتایی پێبێت. لە ھەمان ماوەدا لە ناوچەکانی رۆژھەڵات و رۆژئاوای ناوچەکانی ئۆپەراسیۆنی کانی ئاشتی-دا و بە قووڵایی ١٠ کلم جگە لە شاری قامشلو دەورییەی ھاوبەشی تورک- روس دەست پێدەکات.
ـ سەرجەم پێکھاتەکانی یەپەگە بە چەکەکانیانەوە لە منبج و تەل رەفعەت دەکرێنە دەرەوە.
ـ لە ھەردوو وڵاتەوە رێکاری پێویست لە دژی دزەکردنی تیرۆریستان دەگیرێتە بەر.
ـ کاری ھاوبەش بەمەبەستی ئاسانکردنی گەڕانەوەی پارێزراو و خۆویستانەی پەنابەران، ئەنجام دەدرێت.
ـ لەپێناو چاودێریی کردن و ھەماھەنگیی کردن سەبارەت بە جێبەجێکردنی ئەم یاداشتنامەیە، میکانیزمێکی راستکردنەوە و چاودێرییکردنی ھاوبەش پێک دەھێنرێت.
ـ بەمەبەستی دۆزینەوەی چارەسەرێکی سیاسیی ھەمیشەیی بۆ ناکۆکییەکانی سووریا لایەنەکان لە چوارچێوەی میکانیزمی ئاستانادا درێژە بە کارەکانیان دەدەن و پشتیوانیی لە کارەکانی لیژنەی دەستوور دەکەن".