سلێمانی.. بەڕێوەچونی چلەی سەرکۆماری پێشووی عێراق جەلال تاڵەبانی

سلێمانی ـ AA

لە رێوڕەسمی چلەی جەلال تاڵەبانی، پێشنیوەڕۆی ئەمڕۆ ژمارەیەک لە بەرپرسانی ئەو حزبە لەنێویاندا جێگری یەکەمی سکرتێری گشتی حزبەکە، کۆسرەت رەسول عەلی و بەرھەم ئەحمەد ساڵح کە پێشتر جێگری دووەمی سکرتێری گشتی یەکێتی بوو، لەگەڵ ژمارەیەک لە بەرپرسانی تری ئەو حزبە سەردانی گردی دەباشانیان کرد و تاجە گوڵینەیان لەسەر گۆڕەکەی دانا.

پاش نیوەڕۆش، بە ئامادەبونی خانەوادەکەیی، ژمارەیەکی زۆری بەرپرس و لایەنگرانی حزبەکە، ھەروەھا چین و توێژە جیاجیاکانی تر سەردانی دەباشانیان کرد و بەشداری رێوڕەسمی چلەی تاڵەبانیان کرد و تاجە گوڵینەیان لەسەر گۆڕەکەی دانا.

گوتەبێژی یەکێتیی نیشتمانی کوردستان، سەعدی پیرە لە لێدوانێکی رۆژنامەوانیدا و لە بارەی دواین گۆڕانکارییەکانی ناوخۆیی حزبەکە و دۆخی ناوخۆی یەکێتی دواو گوتی:" رێبازی مام جەلال دژی گەندەڵی و مەحسوبیەت و مەنسوبیەت بوو کە زۆر کەس ھەیە ناتوانێت ئەوانە تەرک بکات، رێبازی مام جەلال دژی شەڕی ناوخۆ و تێکچونی نێوماڵی کورد بوو، ئێستا ھەموو کارێک دەکرێت بۆ ئەوەی نێوماڵی کورد تێک بچێت، ئێمە پێمان وایە ئەو برادەرانەی ئەو قسە زلانە دەکەن ئەگەر بەراست پابەندن بە رێبازی مام جەلال و پابەندن بە کوردایەتییەکی خاڵس با واز لەو کارەکتەرانە بێنن ، ھەموو کەس دەزانێت ئەمڕۆ لەناو عێراق و ھەرێمی کوردستان پشێوی گەورە ھەیە، لەناو یەکێتیی نیشتمانی کوردستانیش پشێوی ھەیە کە خۆمان دروستمان کردووە ، بەخۆشمان نەبێت بە کەس چاک نابێتەوە، بۆیە دەبێت چاکی بکەینەوە".

سەعدی پیرە گوتی:" کۆنگرەی یەکێتی لە دوای ١ی ٣ی ساڵی داھاتوو دەبەسترێت، کۆبونەوەی داھاتوی سەرکردایەتی یەکێتیش لەسەر داوای کاک کۆسرەت دەبێت، بڕیاری ھەڵوەشاندنەوەی مەکتەبی سیاسی لە کۆبونەوەی پێشوو دراوە و ماوەتەوە سەر کۆبونەوەی داھاتوو تا دابنیشین و لێی بکۆڵینەوە بزانین چەند لەگەڵ پەیڕەووپڕۆگرامی ناوخۆ دەگونجێت".

گوتەبێژی یەکێتی ئەوەشی گوت:" حکومەتی رزگاری نیشتمانی تەنھا شیعارە و پێش ماوەیەک ئەمریکا رایگەیاند پشتیوانی لە داخوازییەکانی ھاوڵاتیانی ھەرێمی کوردستان و داخوازییەکانی و حکومەتی ھەرێمی کوردستان دەکات و بەناو ناوی سەرۆک و جێگرەکەی دەکات، داوا لە ھەموو حزبەکانیش دەکات بەوانەشی داوای حکومەتی رزگاری نیشتمانی دەکەن کە پشتیوانی لەو حکومەتەی ئێستا بکەن".


جەلال تاڵەبانی کوڕ‌ی شێخ حیسامەدین کوڕ‌ی شێخ نوری کوڕ‌ی شێخ غە فوور لە ھاوینی ساڵی ١٩٣٣ لە گوندی کەلکان ی قەتپاڵی چیای کۆسرەت لە دایکبووە، کە دەڕ‌وانێتە سەر دەریاچەی دوکان. چەند ساڵێک تەمەنی منداڵی لەو گوندە بەسەر بردووەو دواتر باوکی بووە بەرێبەری تەکیەی تاڵەبانی لە کۆیە .


لە ٠٦ نیسانی ٢٠٠٥، مام جەلال ٢٢٧ دەنگی لە کۆی ٢٤٨ دەنگی ئەندامانی کۆمەڵەی نیشتمانی عیراقی بە دەستھێنا و بە ھەڵبژاردنێکی راستەوخۆ بە یەکەمین سەرۆکی ھەڵبژێراوی عیراق ھەڵبژێردرا لە دوای روخانی دەسەڵاتی پێشووی عێراق لە ساڵی ٢٠٠٣، ڕۆژی ٣-١٠-٢٠١٧ ، لە وڵاتی ئەڵمانیا بەھۆی نەخۆشییەوە کۆچی دوایی کرد .