گیانلەدەستدانی حەوت کەس لە رووداوێکی هاتوچۆدا لەسەر رێگای وان-ئاگری

ئاگری - AA

لە ئاکامی رووداوێکی هاتوچۆدا لە پارێزگای ئاگری کە پاسێک خۆی بە دوو بارهەڵگردا کێشا کە چەوەندەریان بارکردبوو، حەوت کەس گیانیان لەدەست دا.

پاسێکی نەفەرهەڵگر کە گەشتی نێوان وان و ئاگری ئەنجام دەدا لە قەزای توتاک خۆی کێشا بە دوو بارهەڵگردا کە چەوەندەریان بارکردبوو، پێشتر تووشی رووداوی هاتوچۆ بووبوون و بەریەککەوتبوون، ئاگری گرت.

دوای گەیشتنی هەواڵی رووداوەکە، ژمارەیەکی زۆر لە تیمەکانی تەندروستیی، ئاگرکوژێنەوە و جەندرمە گەیشتنە شوێنی رووداوەکە.

بەهۆی کاریگەری بەرکەوتنەکەوە، پاسەکە ئاگری گرت و تیمەکانی ئاگرکوژێنەوە دوای هەوڵ و ماندووبوونێکی زۆر توانیان کۆنترۆڵی بکەن.

لەو رووداوەدا، حەوت کەس لە سەرنشینانی پاسەکە کە سەرجەمیان ٢١ کەس بوون، گیانیان لەدەست دا و ژمارەیەکی زۆریش برینداربوون.

بریندارەکان بەمەبەستی چارەسەر گواسترانەوە بۆ نەخۆشخانەکانی ناوچەکە.

هاوکات بەهۆی رووداوەکەوە، رێگای نێوان ئاگری-وان بۆ ماوەیەک بەڕووی هاتوچۆدا داخرا.