ئاڵوگۆڕی دیل لە نێوان ئۆکراینا و ڕووسیا ئەنجام درا

مۆسکۆ/کیێڤ – AA

لەمیانی ئاڵوگۆڕی دیلەکانی نێوان ئۆکراینا و ڕووسیادا، زیاتر لە ٣٠٠ سەربازی ئۆکراینی و ڕووسی گەڕانەوە وڵاتەکەیان.

سەرۆکی ئۆکراینا، ڤۆلۆدیمێر زێلێنسکی لە هەژماری تۆڕی کۆمەڵایەتی بڵاوی کردەوە کە، لە نێوان وڵاتەکەی و ڕووسیادا ئاڵوگۆڕی دیل ئەنجام دراوە.

زێلێنسکی ڕایگەیاندووە کە لە چوارچێوەی ئاڵوگۆڕی دیلەکان ١٨٧ سەرباز و دوو مەدەنی ئوکراینی ئازاد کراون و هەوڵەکانیان بەو ئاراستەیە بەردەوام دەبێت.

لە لایەکی دیکەوە، وەزارەتی بەرگریی ڕووسیاش لەبارەی ئاڵوگۆڕی دیلەکانەوە ڕاگەیاندراوێکی بڵاو کردووەتەوە کە تێدا هاتووە، "لە ئەنجامی دانوستانەکاندا، ١٥٠ سەربازمان لە دەسەڵاتی کیێڤ وەرگرتەوە و لە بەرامبەردا ١٥٠ سەربازی ئۆکراینیاشمان ڕادەست کردەوە. سەربازە ئازادکراوەکان لە بیلاڕووسن و چارەسەری پزیشکی و دەروونیان پێشکەش دەکرێت. ئیماڕات نێوەندگیری مرۆیی بۆ ئازادکردنی ڕووسەکان کرد".