ئه‌ڵمانیا له‌ كێبڕكێ دایه‌ بۆ بوونه‌ ئه‌ندامی ئه‌نجوومه‌نی ئاسایشی نێوده‌وڵه‌تی

نه‌ته‌وه‌ یه‌كگرتووه‌كان - AA

وه‌زیری ده‌ره‌وه‌ی ئه‌ڵمانیا هه‌یكۆ ماس رایگه‌یاند كه‌ ئه‌ڵمانیا وه‌ك یه‌كێك له‌و وڵاتانه‌ی زۆرترین خزمه‌تی نه‌ته‌وه‌ یه‌كگرتووه‌كانی كردووه‌ و رۆڵی به‌رچاوی هه‌بووه‌ له‌ هاوكاری مرۆیی، ده‌یه‌وێ نوێنه‌رایه‌تی ئه‌نجوومه‌نی ئاسایشی نێوده‌وڵه‌تی بكات.

وه‌زیری ده‌ره‌وه‌ی ئه‌ڵمانیا هه‌یكۆ ماس ئاماژه‌ی به‌وه‌ دا كه‌ وڵاته‌كه‌ی بۆ بوونه‌ ئه‌ندامی ئه‌نجوومه‌نی ئاسایشی نێوده‌وڵه‌تی له‌ كێبڕكێ دایه‌.

ماس له‌ باره‌گای گشتیی نه‌ته‌وه‌ یه‌كگرتووه‌كان له‌باره‌ی هه‌وڵه‌كانی لۆبی ئه‌ڵمانیا بۆ ئه‌وه‌ی وڵاته‌كه‌ی بێته‌ ئه‌ندامی كاتی ئه‌نجوومه‌نی ئاسایشی نێوده‌وڵه‌تی بۆ رۆژنامه‌وانان دوا.

ماس تیشكی خسته‌ سه‌ر ئه‌وه‌ی كه‌ ئه‌ڵمانیا وه‌ك یه‌كێك له‌و وڵاتانه‌ی زۆرترین خزمه‌تی نه‌ته‌وه‌ یه‌كگرتووه‌كانی كردووه‌ و رۆڵی به‌رچاوی هه‌بووه‌ له‌ هاوكاری مرۆیی ده‌یه‌وێ نوێنه‌رایه‌تی ئه‌نجوومه‌نی ئاسایشی نێوده‌وڵه‌تی بكات. ئاماژه‌ی به‌وه‌شدا كه‌ به‌ره‌نگاربوونه‌وه‌ی گۆڕانكاری كه‌شوهه‌وا له‌ پێشینه‌ی كاره‌كانی وڵاته‌كه‌یه‌تی.

ماس ئه‌و ده‌نگۆیانه‌ی ره‌تكرده‌وه‌ كه‌ بانگه‌شه‌ی ئه‌وه‌ ده‌كه‌ن ئه‌ڵمانیا به‌رامبه‌ر ئیسرائیل له‌ كێبڕكێ دایه‌.

ئه‌نجوومه‌نی ئاسایشی نێوده‌وڵه‌تی له‌ ١٥ ئه‌ندام پێك دێ كه‌ پێنجیان ئه‌ندامی هه‌میشه‌یین و بریتین له‌ ئه‌مریكا، چین، رووسیا، به‌ریتانیا و فه‌ڕه‌نسا و ١٠ ئه‌ندامه‌كه‌ی دیكه‌یش ئه‌ندامی كاتین و له‌ نێو پێنج گرووپی جوگرافیدا بۆ ماوه‌ی دوو ساڵ له‌ كۆمه‌ڵه‌ی گشتیی نه‌ته‌وه‌ یه‌كگرتووه‌كان هه‌ڵده‌بژێردێن.

هه‌ر وڵاتێك بۆ ئه‌وه‌ی به‌ ئه‌ندامی ئه‌نجوومه‌نی ئاسایشی نێوده‌وڵه‌تی هه‌ڵببژێردرێت پێویسته‌ له‌ كۆمه‌ڵه‌ی گشتیی نه‌ته‌وه‌ یه‌كگرتووه‌كان كه‌ له‌ ١٩٣ ئه‌ندام پێك دێ دوو له‌سه‌ر سێی ده‌نگه‌كان به‌ده‌ست بهێنێ.

چاوه‌ڕێ ده‌كرێ هه‌ڵبژاردنی ئه‌مساڵ له‌ مانگی حوزه‌یراندا ئه‌نجام بدرێت.