نوێنەری تایبەتی ئەمریکا بۆ رۆژھەڵاتی ناوەڕاست دەستی لەکار کێشایەوە

واشنتۆن - AA

نوێنەری تایبەتی سەرۆکی ئەمریکا بۆ رۆژھەڵاتی ناوەڕاست، جەسن گرینبڵات دەستی لەکار کێشایەوە.

سەرۆکی ئەمریکا، دۆناڵد ترەمپ لە ھەژماری تایبەتی خۆی لە تۆڕی کۆمەڵایەتی تویتەر رایگەیاند "جەسن گرینبڵات لە دوای سێ ساڵ کارکردن لە ئیدارەکەی من، دەست لەکار دەکێشێتەوە و لە کەرتی تایبەت درێژە بە ژیانی کارکردنی دەدات".

ترەمپ ناوبراوی بە "راستگۆ و ھاوڕێ و پارێزەرێکی نایاب" وەسف کرد و گوتیشی: "ھەرگیز ھەوڵەکانی ئەو بۆ ئیسرائیل و دەستەبەرکردنی ئاشتی لە نێوان ئیسرائیل و فەڵەستین لەبیر ناکرێ. بیری ئەو دەکەین. سوپاس جەسن".

بەرپرسێکی باڵای ئەمریکا لە لێدوانێکیدا بۆ میدیاکانی ئەمریکا ئاماژەی بەوەداوە کە لە دوای دەست لەکار کێشانەوەی جەسن، ھەر یەک لە نوێنەری تایبەتی ئەمریکا بۆ ئێران، بریان ھووک و یەکێک لە راوێژکارەکانی جەیرد کوشنەر بە ناوی ئاڤی بێرکوێتیز رۆڵێکی چالاک لە "رێککەوتنی سەدە" دەگێرن.

جەسن گرینبڵات نوێنەری تایبەت سەرۆکی ئەمریکا دۆناڵد ترەمپ بووە و رێکخەری پەیوەندییەکانی نێوان ئیدارەی ئەمریکا و ئیسرائیل بووە.