بێگه‌رد تاڵه‌بانی: "هه‌موو هه‌وڵمان بۆ ئه‌وه‌یه‌ بۆشایی یاسایی دروست نه‌بێت"

هه‌ولێر - AA

بێگه‌رد تاڵه‌بانی رایده‌گه‌یه‌نێت دواهه‌مین كۆبوونه‌وه‌ی خوولی چواره‌می په‌رله‌مان هیچ پڕۆژه‌ یاسایه‌كی تێدا په‌سه‌ند ناكرێت.

سكرتێری په‌رله‌مانی كوردستان بێگه‌رد تاڵه‌بانی له‌ لێدوانێكدا بۆ ئاژانسی ئانادۆڵو رایده‌گه‌یه‌نێت، هه‌وڵی زۆر ده‌ده‌ن بۆ ئه‌وه‌ی خوولی نوێی په‌رله‌مانی كوردستان له‌دوای ته‌واوبوونی واده‌ی یاسایی ئه‌م خوله‌ راسته‌وخۆ ده‌ست به‌كاره‌كانی بكات بۆ ئه‌وه‌ی بۆشایی یاسایی دروست نه‌بێت.

تاڵه‌بانی له‌وباره‌یه‌وه‌ رایگه‌یاند "6ی تشرینی دووه‌م دوا واده‌یی یاسایی خوولی ئێستا كه‌ خوولی چواره‌می په‌رله‌مانی كوردستانه‌، ئێمه‌ وه‌كو په‌رله‌مانی كوردستان به‌ر له‌و واده‌یه‌ به‌دڵنیاییه‌وه‌ كۆده‌بینه‌وه‌ و كۆتایی خوولی چواره‌می په‌رله‌مان راده‌گه‌یه‌نیین تا ئه‌و كاته‌ش بانگهێشتی خوولی نوێی په‌رله‌مانی كوردستان ده‌كرێت بۆ ئه‌وه‌ی كۆبوونه‌وه‌ی خۆی بكات و هه‌وڵ ده‌ده‌ین سوێندی یاسایی بخورێت، هه‌موو هه‌وڵێكی ئێمه‌ بۆ ئه‌وه‌یه‌ كه‌ بۆشایی یاسایی دروست نه‌بێت، واته‌ له‌ 7ی تشرینی دووه‌م خوولی نوێ ده‌ست به‌كاره‌كانی بكات و كۆ ببێته‌وه‌".

سه‌باره‌ت به‌وه‌ی له‌ دوا دانیشتنی خۆیدا خوولی چواره‌می په‌رله‌مانی كوردستان هیچ پڕۆژه‌ یاسایه‌ك په‌سه‌ند ده‌كات، تاڵه‌بانی رایده‌گه‌یه‌نێت "نه‌خێر به‌دڵنیاییه‌وه‌ ئه‌مه‌ دانیشتنی كۆتایی ئه‌م خوله‌یه‌ و هیچ پڕۆژه‌ یاسایه‌ك په‌سه‌ند ناكرێت".

له‌باره‌ی ئه‌گه‌ری دروستكردنی هاوپه‌یمانێتییه‌ك له‌نێوان پارتی دیموكراتی كوردستان و یه‌كێتی نیشتمانی كوردستان له‌نێو په‌رله‌ماندا، سكرتێری په‌رله‌مانی كوردستان گوتی "تائێستا باس له‌ بابه‌تی هاوپه‌یمانێتی له‌گه‌ڵ پارتی نه‌كراوه‌، هه‌موو هێزه‌ سیاسییه‌كان فراكسیۆنی تایبه‌ت به‌ خۆیان هه‌یه‌، به‌ڵام خۆتان ده‌زانن له‌ پێكهێنانی حكوومه‌ت پێویستی به‌ ته‌وافوق و رێككه‌وتنی نێوان لایىه‌نه‌ سیاسییه‌كانه‌ و ئه‌مه‌ ئه‌جێندایه‌ك كۆیان ده‌كاته‌وه‌ و ئه‌و ئه‌جێندایه‌ش ده‌بێته‌ كارنامه‌ی حوكمڕانی له‌هه‌رێمی كوردستان".

له‌كۆتایی قسه‌كانیدا بێگه‌رد تاڵه‌بانی باسی له‌وه‌ كرد كه‌ پۆستی سه‌رۆكی په‌رله‌مان له‌ خوولی پێنجه‌م ده‌كه‌وێته‌ سه‌ر وتوێژه‌كانی نێوان یه‌كێتی و پارتی، له‌و باره‌یه‌وه‌ روونی ده‌كاته‌وه‌ "ئه‌وه‌ی په‌یوه‌سته‌ به‌ پۆستی سه‌رۆكی په‌رله‌مانه‌وه‌ ئه‌وا ده‌كه‌وێته‌ ته‌وافوقی نێوان یه‌كێتی و پارتی كه‌ ئه‌و پۆستانه‌ی هه‌ن چۆن له‌نێوان هه‌ردوولا دابه‌ش ده‌كرێت".