سه‌ردانی سەرکۆماری عێراق بۆ سلێمانی

سلێمانی ـ AA

لە یەکەم سەردانیدا بۆ هەرێمی کوردستان لە دوای وەرگرتنی پۆستی سەرکۆماری عێراق، پێش نیوەڕۆی ئەمڕۆ بەرھەم ئەحمەد ساڵح بە سەردانێکی فەرمی گەیشتە شاری سلێمانی و لە نێو فڕۆکەخانەی نێودەوڵەتیی سلێمانی لەلایەن ژمارەیەکی زۆر لە بەرپرسانی حکوومی و حزبی و چین و توێژە جیاجیاکانی شارەکەوە پێشوازی لێکرا.

بەرھەم ساڵح دوای گەیشتنی بە سلێمانی و لە کۆنگرەیەکی رۆژنامەوانیدا لەنێو فڕۆکەخانەی سلێمانی، سەرەتا ھاوخەمی خۆی بۆ زیانلێکەوتووانی باران و لافاوی رۆژی رابردووی چەند ناوچەیەکی ھەرێمی کوردستان نیشاندا و ئامادەیی ھاوکاری بەغدای بۆ زیانلێکەوتووان نیشاندا، ھەروەھا ھاوخەمی نیشاندا بۆ زیانلێکەوتووانی بازاڕی لەنگەی ھەولێر، پرسە و سەرەخۆشی خۆشی ئاراستەی کەسوکاری قوربانیان و بریندارانی تەقەکردنی خۆشی شەوی ھەڵبژاردنی خۆی کرد وەک سەرکۆماری عێراق.

بەرھەم ساڵح گوتی: "دەرفەتێکی نوێیە لە عێراق بە ھاتنە کایەی حکوومەتی نوێ و ئەم ھەڵبژاردنە تازەیەی لە عێراقدا روویدا و ھەڵبژاردنی سەرۆکایەتییەکانی عێراق و پێکھێنانی حکوومەتی نوێ دەرفەتێکی نوێیە بۆ ھەموو پێکھاتەکانی عێراق بۆ چارەسەرکردنی کێشەکان کە ساڵەھایە کەڵەکە بوون لەسەر دۆخی عێراق کە لە ساڵی ٢٠٠٣ ەوە تائێستا دۆخێکی ناجۆر و ناھەموار بووە".

ئەو گوتی: "کۆمەڵێک کێشەی کەڵەکەبوو بووەتە ھۆی کێشە بۆ خەڵک و ژیان و گوزەرانی خەڵک لەم وڵاتەدا ھاتووەتە کایەوە، ھیوایەک ھەیە لە ئارادا کە بەم حکوومەتە تازەیە و بەم پێکھاتە تازەیە بتوانرێت بەشێک لەو کێشە و گرفتانە چارەسەر بکرێت، لەو نێوەندەشدا کێشەکانی نێوان ھەرێم و بەغدا بەپێی دەستوور ئەرکێکی لە پێشینەمان دەبێت".

بەرھەم ساڵح ئەوەشی گوت: "دەستووری عێراق روونە و ئەرکی سەرشانی من وەک سەرکۆماری عێراق ئەوەیە پارێزەری دەستوور بم، بە ھەموو ھێز و توانای خۆمەوە ھەوڵ دەدەم ئەو مافە دەستووریانەی خەڵکی کوردستان و پێکھاتەکانی تری عێراق پارێزراو بێت و خێر و بێری عێراق بۆ ھەمووان بێت".

سەرکۆماری عێراق ئاماژەی بەوەش کرد، ئەرکی بەردەمیان قورسە و ئەو کێشانەی کە ھەیە کێشەی کەڵەکەبوون، بۆ ئەوەش ئیرادەی سیاسی و یەکدەنگی ھەمووانی پێویستە.

بەرھەم ساڵح باسی لەوەش کرد، لە ماوەی ھەفتەیەک تا دە رۆژی داھاتوو پێکھاتەی حکوومەتی عێراقی تەواو دەکرێت و بەرنامەکەی عادل عەبدولمەھدی دەکەوێتە بواری جێبەجێکردنەوە.

بەرھەم ساڵح لە بارەی دۆخی ئێستای شاری کەرکووک و ناوچە ناکۆکی لەسەرەکان دواو و گوتی: "دۆخی کەرکووک و ئەو ناوچانە دۆخێکی نائاساییە و پێویستە ئەو دۆخە ئاسایی بکەینەوە، من دەستبەجێ لە رۆژانی یەکەمی کارکردنم لە کۆشکی سەلام لەگەڵ پێکھاتە جیاجیاکانی کەرکووک و لایەنە پەیوەندیدارەکان کۆبوومەوە، ئەو دۆخە دۆخێکی نائاساییە و دەبێت ئاسایی بکرێتەوە، چارەسەرکردنی دۆخی ئەو ناوچانە دەبێت بە رەچاوکردنی بەرژەوەندی پێکھاتەکانی ئەوێ بێت".

سەرکۆماری عێراق لە ماوەی مانەوەیدا لە شاری سلێمانی، زنجیرەیەک دیدار و کۆبوونەوە و سەردان ئەنجام دەدات.