سەرۆكایەتی هەرێمی كوردستان ئیدانەی كودەتا سەربازییەكەی توركیا دەكات

لە ڕاگەیێندراوێكدا كە لە ماڵپەڕی فەرمی سەرۆكایەتی هەرێمی كوردستان بڵاوكراوتەوە و تێیدا ئاماژە بەوە كراوە كە سەرۆكایەتی هەرێمی كوردستان ئیدانەی هەموو هەوڵێك دەكات كە لەدژی ئیرادەی گەل و پڕەنسیپەكانی دیموكراسی بیەوێت سیستەمی سیاسیی هەڵبژێردراو لەڕێگەی چەك و كودەتا بڕوخێنێت.


دەقی ڕاگەیێندراوی سەرۆكایەتیی هەرێمی كوردستان

لەبارەی كۆدەتا سەربازییەكەی شەوی 15 لەسەر 16ـی 7ـی 2016ـی توركیا، سەرۆكایەتیی هەرێمی كوردستان ئیدانەی هەموو هەوڵێك دەكات كە لەدژی ئیرادەی گەل و پڕەنسیپەكانی دیموكراسی بیەوێت سیستەمی سیاسیی هەڵبژێردراو لەڕێگەی چەك و كۆدەتا بڕووخێنێت. چونكە لۆژیكی چەك و توندوتیژی دژی دیموكراسیە و سەقامگیریی سیاسی و پێكەوەژیان تێكدەدات.

خۆشحاڵین كە هاووڵاتیانی توركیا پشتیوانی حكوومەتی شەرعی و هەڵبژێردراو بوون و ڕێگەیان نەدا كۆدەتاچییەكان سەر بكەون. هەرێمی كوردستانی عێراق خوازیاری سەقامگیری و ئاشتیە لە توركیا و ناوچەكە. چونكە تەنیا سەقامگیری و ئاشتییە خزمەتی بەرژەوەندیی گەلانی ناوچەكە دەكات.


سەرۆكایەتیی هەرێمی كوردستان

16ـی 7ـی 2016