ھۆشیار زێباری: "ئەوەی لە کۆبوونەوەکەی ئەنجوومەنی پارێزگای کەرکووک ڕوویدا نایاساییە"

ھەولێر ــ AA

ئەندامی دەستەی کارگێڕی مەکتەبی سیاسیی پارتی دیموکراتی کوردستان، هۆشیار زێباری کۆبوونەوەکەی ١٠ی ئەم مانگەی ئەنجوومەنی پارێزگای کەرکووک لە ھوتێل ڕەشید لە بەغدا بە نایاسایی لەقەڵەمدا و ڕایگەیاند: "کەرکووک عێراقێکی بچووکراوەیە و حکومڕانی تیایدا ناکرێت و بەردەوام نابێت، ئەگەر بە ڕێککەوتن، ھاوسەنگی و بەشداری پێکھاتە سەرەکییەکان نەبێت، بەتایبەتیش تورکمان".

ھۆشیار زێباری لە تۆڕی کۆمەڵاتی ئێکس نووسیوویەتی: " ئەوەی لە کۆبوونەوەکەی ئەنجوومەنی پارێزگای کەرکووک لە ھۆتێل ڕەشید لە بەغدا ڕوویدا و ئەوەی پێکھاتەی سووننەی عەرەبی لە سیادە و تەقەدوم چوونە پاڵ ھاوپەیمانێتی یەکێتی نیشتیمانی کوردستان و بابلیۆن، کارێک بووە لە شەودا کراوە و نا یاساییە".

ڕاشیگەیاندووە: "ئەوەی لە کۆبوونەوەکەدا ڕوویدا، سەرکەوتوو نابێت، چونکە کەرکووک عێراقێکی بچووکراوەیە و حکومڕانی تیایدا ناکرێت و بەردەوام نابێت، ئەگەر بە ڕێککەوتن، ھاوسەنگی و بەشداریی پێکھاتە سەرەکییەکان نەبێت، بەتایبەتیش تورکمان".

ھەروەھا ئاماژەی بەوەشداوە: "ئەوەی لە کۆبوونەوەی ئەنجومەنی پارێزگای کەرکووک لە ھۆتێل ڕەشید ڕوویدا، ئەوە بوو کە دوو ئەندام چوونە پاڵ ھاوپەیمانێتی یەکێتیی نیشتمانی کوردستان و بابلیۆن، ئەوەش لە پێناو بڕێک دۆلاری پيسدا!! لەسەر حیسابی بەرژەوەندییەکانی کەرکووکییەکان و سەقامگیری و پێشکەوتنی پارێزگاکە".

شەوی ١٠ی ئەم مانگە، بەبێ بەشداری پارتی دیموکراتی کوردستان و بەرەی تورکمانی و ئەندامانی ھاوپەیمانی عەرەبی، دانیشتنی ئەنجوومەنی پارێزگای کەرکووک لە ھوتێلی ڕەشید لە بەغدا بەڕێوەچوو کە لە میانیدا پارێزگار و سەرۆکی ئەنجوومەنی پارێزگاکە ھەڵبژێردران.

لە دانیشتنەکەدا، ھەریەک لە ئەندامی ئەنجوومەنی پارێزگای کەرکووک لە فراکسیۆنی یەکێتیی نیشتمانی کوردستان ، ڕێبوار تەھا بە پارێزگار، ئەندامی ئەنجوومەنی پارێزگا لە فراکسیۆنی ھاوپەیمانی "قیادە"، محەمەد ئیبراھیم حافز بە سەرۆکی ئەنجوومەن و ئەندامی ئەنجوومەنی پارێزگا لە فراکسیۆنی بابلیۆن (کۆتای مەسیحی)، ئەنجیل زیا شیبا بە بڕیاردەری ئەنجوومەنی پارێزگای کەرکووک ھەڵبژێردران.

دوێنی دووشەممە، پارتی دیموکراتی کوردستان ڕایگەیاندبوو: دانانی پارێزگار و حکوومەتی خۆجێیی کەرکوک لە ١٠ی ئەم مانگەدا لە ھوتێل ڕەشید لە بەغدا، بەبێی ئاگادارکردنەوەی ھەموو لایەنەکان و لە غیابی نوێنەرانی تورکمان و بەشێک لە عەرەب و پارتی کراوە، یاسایی نییە و گرفتی ھەیە و لە سەر ڕێگەیەکی دروست نییە. پێمانوایە ئەوەی کراوە ناتوانێت ببێتە چارەسەرێکی دروست بۆ تێپەڕاندنی کێشە و گرفتەکانی شاری کەرکووک. چارەسەرکردن و نەھێشتنی کێشەکانی ئەو شارە و سارێژکردنی ژان و ئازارەکانی خەڵکی کەرکووک بە موزایەدات و عاتیفە و یاریی سیاسی ناکرێن. چارەسەر ئەوەیە تاکڕەویی نەکرێت و ھەوڵی پەراوێزخستنی لایەنەکان نەدرێت و ھەموو لایەک بە نیازپاکییەوە و لەپێناو خزمەتکردنی خەڵک لە بەڕێوەبردنی کەرکووکدا بەشدار بن".