ئەنجامدانی نوێژی جەژنی قوربان لە شاری سلێمانی

سلێمانی - AA

بەیانی ئەمڕۆ لە شاری سلێمانی، لە پاش نوێژی بەیانی مزگەوتەکان دەستیان بە تەکبیراتی جەژنی قوربان کرد، هاووڵاتیانیش بە جۆش و خرۆشەوە ڕوویان لە مزگەوتەکان کرد بۆ ئەنجامدانی نوێژی جەژن.

لە پێشوازی جەژنی قورباندا، دڵخۆشی بە ڕوخساری هاووڵاتيیانەوە دیار بوو و بە جلوبەرگی نوێوە بەشدارییان لە نوێژی جەژندا کرد.

لە مزگەوتی ئەحمەدی حاجی عەلی، مامۆستا فاتیح شارستانی گوتاری جەژنی بە هەردوو زمانی کوردی و عەرەبی پێشکەش کرد و، تێیدا ئاماژەی بە ئادابەکانی جەژن و چۆنيیەتی قوربانیی کردن کرد.

مامۆستا فاتیح داوای لە هاووڵاتیيان کرد ڕەچاوی ڕێنماییە تەندروستییەکان بکەن لە کاتی قوربانیی کردندا.

لە گوتارەکەیدا مامۆستا فاتیح نزای خێر و خۆشی بۆ سەرجەم موسڵمانان و بەتایبەتی بۆ دانیشتوانی غەززە کرد و، ئومێدی خواست ئەم جەژنە ببێتە مایەی ئاشتیی و سەقامگیریی بۆ هەموو ناوچەکە.