دەستبەرداگرتنی کارگەیەکی دروستکردنی ماددەی ھۆشبەر لە سلێمانی ڕاگەیاندرا

ھەولێر ــ AA

ئەنجوومەنی باڵای دادوەریی عێراق ڕایگەیاند کە لە ناوچەیەکی باشووری بەنداوی دەربەندیخان سەربە پارێزگای سلێمانی، دەست بەسەر کارگەیەکی دروستکردنی ماددەی ھۆشبەری کاپتاگۆن و کریستاڵدا گیراوە.

ڕۆژنامەی "القضا‌ء" سەربە ئەنجوومەنی باڵای دادوەریی عێراق بڵاویکردەوە کە دادوەر لە دادگای لێکۆڵینەوەی ناوەندیی و بەرپرسی لێکۆڵینەوە لە دۆسیەکانی مادەی ھۆشبەر لە ڕەسافە، وەلید ئیبراھیم ڕایگەیاندووە: "دوای ئەوەی زانیارییان بەدەست گەیشتووە لەبارەی بوونی کارگەیەک لە ناوچەیەکی باشووری بەنداوی دەربەندیخان کە تایبەت بوو بە دروستکردنی حەبی کاپتاگۆن و مادەی ھۆشبەری کریستاڵ، ھێزە ئەمنییەکان لە میانی ئۆپەراسیۆنێکدا بۆ سەر کارگەکە، توانیوویانە دەست بەسەر بڕی ١٥١ ھەزار و ٧١١ کیلۆگرام ماددەی ھۆشبەردا بگرن".

ئاماژەی بەوەشداوە ھەر بەپێی زانیارییەکان، دەرکەوتوو کە لە ڕێگای بارھەڵگرەوە، ١٠٠ کیلۆگرام ماددەی ھۆشبەر لە کارگەکەوە ڕەوانەی وڵاتانی کەنداو کراوە.