Албанската полиција објави детали од акцијата за апсење на основачот на берзата за криптовалути „Тодекс“

TИРАНА (AA) - Албанската полиција реагираше во врска со акцијата за апсење на основачот на платформата „Тодекс“, Фарук Фатих Озер, за кого Туркије распиша црвена потерница, а исто така имаше распишано и меѓународна потерница, објавувајќи ги деталите од акцијата, пренесува Aгенција Анадолија АА).

Во официјалното соопштение на локалната полициска управа во Елбасан се наведува дека операцијата ја извршила локалната полициска управа (ЛПУ) на Елбасан, во соработка со ФАСТ Албанија и локалната полициска управа на Валона, под раководство на Обвинителството при Судскиот округ Елбасан.

„Во текот на работата за фаќање на лицата за кои има распишано национална и меѓународна потерница, по многу претреси во повеќе региони во државата, врз основа на добиените информации преку оперативен пат за локацијата на едно многу барано лице од турското правосудство, како и благодарение на „користење проактивни методи од страна на ЛПУ Елбасан, во соработка со Обвинителството на судскиот округ Елбасан, беше организирана и финализирана полициската акција наречена „Бреин“. Во рамките на оваа операција, беше уапсен и приведен турскиот државјанин Ф. О., 28 години“, се вели во полицискиот извештај.

Според полицијата, Озер е фатен во Химаре, за кој турските власти во 2021 година распишаа потерница за кривичните дела „Формирање криминална организација“ и „Измама со тешки последици“.

„За време на операцијата заедно со бараниот граѓанин биле уште две други државјанки, Б.Ш., 36 години, жителка на Тирана и Е. Х., 37, жителка на Драч, кои биле однесени за понатамошни иследувања за да ја појаснат процедурално својата поврзаност во однос на бараниот со меѓународна потерница“, се наведува понатаму во соопштението.

Полицијата додаде дека како материјален доказ се одземени лаптопи, мобилни уреди, банкарски картички и друг материјал.

Во меѓувреме, во врска со случајот, процесниот материјал е предаден на Обвинителството при Судскиот окружен суд Елбасан за понатамошни дејствија.

Од друга страна, турските власти потврдија дека ја започнале постапката за екстрадиција на Фарук Фатих Озер во Туркије од Одделот за Интерпол при Генералната управа на полицијата.

Турското обвинителство на 22 април 2021 година официјално ја започна истрагата откако корисниците пријавија дека немаат пристап до своите сметки на берзата за криптовалути „Тодекс“ и дека сопственикот на компанијата ја напуштил земјата.

Во рамките на истрагата беше потврдено дека осомничениот сопственик на компанијата, Фарук Фатих Озер, ја напуштил земјата на 20 април 2021 година.

Последователно, беше издадена наредба за приведување на многу осомничени, меѓу кои и Озер, по кој претходно беше распишана потерница.

Исто така за Озер беше распишана црвена потерница на 23 април 2021 година и од Интерпол.