Ердоган: „Туркије и Босна и Херцеговина се договорија за патување без пасоши“

АНКАРА (АА) - Турскиот претседател Реџеп Таип Ердоган денес изјави дека Анкара и Сараево одлучиле да им дозволат на своите граѓани да патуваат меѓусебно без пасоши, јавува Агенција Анадолија (АА).

„Сега донесовме одлука да (овозможиме) патување меѓу Босна и Херцеговина и Туркије со лични карти“, изјави Ердоган на прес-конференцијата во Сараево заедно со тројцата членови на Претседателскиот совет на Босна и Херцеговина.

Ердоган изјави дека Туркије и Босна и Херцеговина во моментов работат на патување без пасоши, додавајќи дека тоа наскоро ќе стапи во сила.

Претседателот рече дека односите меѓу Туркије и Босна и Херцеговина се „исклучителни“, изразувајќи поддршка за територијалниот интегритет и стабилност на земјата.

Ердоган повтори дека Туркије е подготвена да даде сè од себе за да се надминат сегашните тешкотии во Босна и Херцеговина.

„Да се биде овде на 30-годишнината од воспоставувањето на нашите дипломатски односи ѝ дава на нашата посета историски карактер“, рече тој.

Од своја страна, бошњачкиот член и актуелен претседавач со Претседателството на Босна и Херцеговина, Шефик Џаферовиќ, рече дека Туркије и Босна Херцеговина имаат пријателски односи, а нивните историски и културни врски се силни, додавајќи дека сакаат да ги зајакнат врските со Анкара.

Џаферовиќ рече дека Босна и Херцеговина сака да го прошири обемот на билатералната трговија со Туркије на 1 милијарда долари.

Тој, исто така рече дека ја цени улогата на Туркије во посредувањето меѓу Русија и Украина за дозволување извоз на жито.

- Тензии со Грција

Ердоган го повтори предупредувањето до Грција, велејќи: „Одеднаш, можеме да дојдеме преку ноќ.“

„Тие имаат острови, има бази на овие острови... и ако продолжат овие нелегитимни закани против нас, ќе има крај на нашето трпение“, рече тој.

Турските авиони ангажирани во мисиите на НАТО над Егејското Море и Источниот Медитеран на 23 август беа вознемирувани од рускиот систем за воздушна одбрана С-300 стациониран на грчкиот остров Крит.

Според извори од турското Министерство за национална одбрана, Грција го нарушила воздушниот простор и територијалните води на Туркије над 1.100 пати само во првите осум месеци од оваа година.

Тукије, која е членка на НАТО повеќе од 70 години, се пожали на повторените провокативни акции и реторика од страна на Грција во регионот во последните месеци, вклучително и вооружувањето на островите во близина на турските брегови кои се демилитаризирани според договорот, велејќи дека таквите потези ги оневозможуваат нејзините напори со добра волја за мир.