СКОПЈЕ (АА) - Десетици матуранти од повеќе средни училишта се собраа на протест пред Министерството за образование и наука (МОН) во Скопје со барање да се скрати материјалот за државната матура, јавува Анадолу.
Матурантите, организирани преку Организацијата за дијалог и афирмација на средношколците (ОДАС), рекоа дека во текот на нивното четиригодишно средно образование биле сведоци на прекини на наставата или следење онлајн настава.
Држејќи плакат на кој стоеше „Бараме МОН да ни излезе во пресрет“, тие потсетија дека во 2020 година, кога ја следеле настава во прва година од средното образование, наставата била прекината неколку месеци поради појавата на коронавирусот (Ковид-19).
„Ние протестираме сѐ со цел да ни се скрати матурата поради сите оние пречки што ни излегоа во образованието. Откако почна короната на 10 март (2020 г.), во првата година на нашата генерација, губевме часови, значи немавме настава тие три месеци до крајот на годината“, рече средношколецот Драган Димов.
Тој додаде дека наредната година наставата се одвивала онлајн, потенцирајќи дека таквата настава не била квалитетна и дека не можела да се изведе кога се во прашање стручните школи кои имаат и практична настава.
Во текот на нивната трета година од средно образование, Димов посочи дека повторно имале пречки во наставата.
„Штрајкот на професорите исто така ни правеше проблем во наставата, како и штрајкот на ЈСП оваа година и дојавите на бомби кои сѐ уште траат, и ние сакаме од МОН да ни излезе во пресрет, да ни се скрати матурата, сѐ со цел да можеме да си ги оствариме нашите потреби за упис на факултет“, изјави Димов.
Тој истакна дека кога веќе не се укинува државната матура, барем да се олесни материјалот за оваа генерација на матуранти.
Димов најави дека протестот и бојкотот на наставата ќе се одвиваат секој ден, додавајќи дека доколку не се исполнат нивните барања, тие ќе ја бојкотираат и државната матура.
