МВР: Тројца слушатели на основна обука за полицаец паднале во бесознание

СКОПЈЕ (АА) - Рано утринава за време на обуката за полицајци во Центарот за обука на Министерството за внатешни работи во Скопје, неколку лица се пожалиле на мачнина и тегоби во стомакот, по што веднаш била повикана Итна медицинска помош, пренесува Anadolu Agency (AA).

Во врска со случајот, од МВР соопштија дека тројца слушатели на обуката од непознати причини паднале во бесознание, по што веднаш од страна на дисциплинските старешини било интервенирано.

„Утринава во Центарот за обука на Министерството за внатешни работи, поточно во времето околу 08:20 часот, при спроведување на утринска смотра со слушателите на основна обука за полицаец, Генерација 2017/18 година, во присуство на дежурните на Центар за обука, Командирот на класа како и други дисциплински старешини, тројца слушатели од непознати причини паднале во бесознание, по што веднаш од страна на дисциплинските старешини било интервенирано. Истите се извлечени од строј и им е укажана прва помош по кој истите изјавија дека се чуствуваат подобро", информираат од Министерството за внатрешни работи.

Од таму велат дека во меѓувреме на тегоби и вртоглавици се пожалиле уште неколку слушатели, за што од страна на Дежурните на Центар и Командирот на класа утринската смотра е прекината, а кандидатите упатени се во училници.

„За настанот веднаш е повикана Брза помош и околу 09:10 часот пристигна едно амбулантно возило од Итна медицинска помош, и од страна на медицинскиот персонал им се извршени медицински прегледи на 38 слушателите. Три од лицата со амбулантното возило од Итна медицинска помош се пренесени во Клинички центар, две од нив се пуштени веднаш по дополнителниот преглед додека едно лице е задржано", додаваат од МВР.

За целиот настан се запознаени соодветните органи во Министерството за внатрешни работи, кои во координација со Агенција за храна, околу 11.30 часот од објектот за исхрана во Центар за обука, подигнале примероци од храна за понатамошно постапување.