Народен правобранител: Поддршката на жртвите од тортура, основа на демократијата

СКОПЈЕ (АА) - Народниот правобранител на Република Македонија Иџет Мемети во соопштение по повод 26 Јуни, Меѓународниот ден за поддршка на жртвите од тортура порача дека поддршката на жртвите од тортура е основа на демократијата на едно општество, пренесува Anadolu Agency (AA).

„Обврската за борба против тортурата и нехуманиот третман не смеат да бидат само декларативни, туку крајно време е властите да преземат конкретни мерки и активности за сузбивање на ваквите состојби, а на жртвите кои биле предмет на мачење или друго сурово, нечовечно или понижувачко постапување да им обезбедат соодветна правна, медицинска, психолошка и социјална поддршка", порачува Народниот правобранител.

Тој истакнува дека поддршката на жртвите од тортура претставува една од основните обврски на секое општество кое ги почитува демократските принципи и меѓународни стандарди за човековите права.

„Народниот правобранител како Национален превентивен механанизам врши континуиран мониторниг во местата на лишување и ограничување на слободата на движење и постојано алармира за нехуманите услови и понижувачкиот третман на којшто се изложени лицата во овие места", се вели во соопштението.

Инаку, на 12 декември 1997 година, со резолуцијата 52/149, Генералното собрание на Обединетите нации го прогласи 26 Јуни како Меѓународниот ден за поддршка на жртвите на тортура, со цел целосно искоренување на тортурата и ефективно функционирање на Конвенцијата против тортура и друго сурово, нечовечно или понижувачко постапување или казнување.