БЕЛГРАД (АА) - Претседателот на Република Србија, Александар Вучиќ, се сретна со делегацијата на Меѓународниот монетарен фонд (ММФ) предводена од шефот на мисијата во Србија, Донал Мекгетиган, јавува Анадолу.

Вучиќ најави дека со делегацијата на ММФ разговарал за најважните прашања од соработката, проекциите за наредниот период, анализите на ризик и пазарните трендови, како и очекуваниот прилив на странски директни инвестиции и фискалната дисциплина.

„Разговаравме и за економските реформи, стратешките планови за понатамошен развој на нашата земја и зајакнувањето на соработката меѓу Србија и ММФ. Укажав на одличните резултати постигнати во претходниот период, особено во однос на падот на инфлацијата и мерките за контрола на инфлаторните шокови, зајакнувањето на пазарот на труд и никогаш поголемите резерви со кои располагаме денес“, рече Вучиќ.

Според негова проценка, Србија преку сериозни мерки и добри прогнози бележи силен раст и покрај енергетската криза, и продолжува да инвестира во потребната инфраструктура и други капитални проекти, со цел дополнително да се зголеми приливот на нови инвестиции.

„Разменивме мислења и за предизвиците со кои Србија, како и поголемиот дел од светот, се соочува во актуелните економски околности. Му се заблагодарив на ММФ за поддршката во напорите на нашата земја за создавање добра инвестициска средина, како и за препораките за натамошно зајакнување на фискалната стабилност“, рече Вучиќ.

Тој додаде дека имајќи ја предвид моменталната динамика на стопанската активност и очекувањата до крајот на годината, остануваат на проценката за раст од 3,8 отсто, како и дека планираат уште посилен раст во наредните години.

„Разменивме мислења за понатамошни мерки и чекори за зачувување на макроекономската и финансиската стабилност, зајакнување на отпорноста на економијата и реформи во домашниот енергетски сектор. Во овој контекст, истакнав дека зајакнувањето на соработката меѓу нашата земја и ММФ е од големо значење за економскиот напредок на Србија и обезбедувањето стабилност, како и дека Србија останува посветена на отворена и конструктивна размена со ММФ, како една од најпочитуваните светски финансиски институции“, додаде Вучиќ.