Dzihat Aliju
15 Јули 2025•Ажурирај: 16 Јули 2025
СКОПЈЕ (АА) - Во Скопје се одржа комеморативна церемонија, организирана од турската Амбасада, по повод деветтата годишнина од обидот за државен удар во Турција, обид преземен од терористичката организација ФЕТО, кој се одбележува како Ден на демократијата и националното единство, јавува Анадолу.
На церемонијата што се одржа во резиденцијата на Амбасадата присуствуваа претседателката на Северна Македонија, Гордана Силјановска-Давкова, претседателот на Собранието, Африм Гаши, вицепремиерот и министер за животна средина и просторно планирање, Изет Меџити, началникот на Генералштабот, генерал-мајор Сашко Лафчиски, министерот за надворешни работи и надворешна трговија Тимчо Муцунски, министерот за европски прашања, Орхан Муртезани, претседателот на Исламската верска заедница на Северна Македонија (ИВЗ), Шаќир Фетаху, министри, пратеници, градоначалници, лидери и претставници на политичките партии во земјата, претставници на турските и локалните институции и организации, како и многу гости.
Програмата започна со минута молчење и интонација на турската национална химна.
Во својот говор, амбасадорот Фатих Улусој ги потсети присутните дека поминати се девет години од предавничкиот обид за државен удар од страна на терористичката организација ФЕТО и рече дека овој собир е со цел да им оддадат почит на шехидите и херојската борба на турската нација за демократија.
Улусој истакна дека обидот за државен удар на 15 јули бил спречен под водство на претседателот Реџеп Таип Ердоган и решителниот став на турскиот народ, додавајќи: „15 јули е победа на нацијата“.
Турскиот амбасадор нагласи дека мрачната организација, која ги експлоатира сите универзални вредности за своите скриени агенди, претставува голема закана за националната безбедност на сите земји и општества во кои дејствува. „Голем дел од структурите на ФЕТО во пријателски и сојузнички земји се нарушени благодарение на меѓународната соработка што ја спроведува нашата држава. Порано или подоцна, оваа терористичка и криминална организација ќе биде целосно разбиена. Кога ќе се случи тоа, членовите на организацијата што живеат во некои трети земји ќе станат товар за овие земји“, рече тој.
Улусој истакна дека решително продолжуваат со напорите за затворање на образовните институции поврзани со ФЕТО во странство и нивно префрлање во Турската фондација „Маариф“ (TMV), и потсети дека како позитивен резултат на овие напори, активностите на училиштата на ФЕТО се прекинати во многу пријателски и братски земји.
Истакнувајќи дека Турската фондација „Маариф“ (TMV) презела повеќе од 200 училишта во многу земји, Улусој рече: „По 15 јули, турската фондација 'Маариф' отвори училишта што нудат високо образование во сите региони и спаси многу ученици од стапицата на ФЕТО. Северна Македонија е меѓу земјите каде што работи Фондацијата 'Маариф'. Понатаму, со жалење забележуваме дека ФЕТО продолжува да го одржува своето присуство во Северна Македонија и, под маската на образовна институција, го експлоатира името на Јахја Кемал, еден од најважните поети на турската литература.“
Турскиот амбасадор рече дека не ги заборавиле граѓаните на пријателската и братска земја Северна Македонија, кои застанаа на страната на Турција за време и по борбата на турскиот народ со пучистите на ФЕТО. „Веруваме дека за членовите на ФЕТО нема место во оваа пријателска и братска земја. Вашето присуство овде со нас денес навистина го покажува тоа. Се надеваме дека нашата соработка во оваа област со нашиот пријател и сојузник, Северна Македонија, ќе даде конкретни резултати. Турција ќе продолжи со својата решителна борба против сите терористички организации, вклучително и ФЕТО, и дома и во странство“, нагласи Улусој.
Како дел од програмата, беа упатени молитви, а гостите ја посетија изложбата за 15 јули, подготвена со придонес од Анадолу и Институтот „Јунус Емре“ (YEE).
