Ata Ufuk Şeker
03 Март 2023•Ажурирај: 05 Март 2023
БРИСЕЛ (АА) - Портпаролот на Комитетот на постојани претставници (COREPER) при Европскиот совет, Даниел Холмберг, на својот профил на социјалните мрежи објави дека наместо на 7 март, донесена е одлука според која датумот за гласање на претставниците на земјите членки за регулативата што ќе донесе построги стандарди за емисијата на јаглерод во новите автомобили и лесните комерцијални возила што ќе се продаваат во земјите на ЕУ е одложен за некој друг датум во иднина.
Според регулативата, што беше одобрена од Генералното собрание на Европскиот парламент (ЕП) минатиот месец и мора да биде официјално одобрена од земјите членки на ЕУ за да стапи во сила, сите нови автомобили и лесни комерцијални возила што ќе се продаваат во земјите членки на ЕУ од 2035 година ќе мора да бидат со нулта емисија.
Производителите на автомобили потребно е да ја отстранат емисијата на јаглерод до 2035 година. На тој начин, по наведениот датум, новите автомобили со мотори со внатрешно согорување, вклучувајќи ги бензинските и дизел-моторите, нема да можат да се продаваат во земјите на ЕУ.
Целта за намалување на емисиите на јаглерод до 2030 година изнесува 55 отсто за автомобилите и 50 отсто за лесните комерцијални возила. Во исто време, ќе биде развиена и нова методологија за проценка на вкупната емисија на јаглерод што возилото ќе ја испушта во текот на свој работен век. Ќе се обезбеди граничните вредности на емисијата на јаглерод да се во согласност со емисијата при реална употреба.
Споменатата регулатива е меѓу предлозите вклучени во пакетот „Adapt to 55“, кој е дел од Европскиот зелен договор и има за цел да ги намали емисиите на јаглерод за најмалку 55 проценти до 2030 година.
Оваа недела, некои земји од ЕУ, особено Германија и Италија, се спротивставија на обидот да се забрани продажбата на нови автомобили со мотори со внатрешно согорување почнувајќи од 2035 година.
За да ја поддржи иницијативата, Германија соопшти дека ЕУ треба да воведе франшиза за обновливата енергија и производство на синтетички горива кои се способни да се врзат со јаглерод диоксид во воздухот, барајќи од Комисијата на ЕУ да подготви регулатива по ова прашање.
И Италија се изјасни против споменатата регулатива и истакна дека изборот на електрични автомобили не треба да биде единствениот начин за постигнување на нулта емисија.
