Наскоро достапни комплетите за тестирање на коронавирусот направени во Турција

АНКАРА (АА) - Комплетите за тестирање на коронавирусот направени во Турција ќе бидат достапни за употреба во наредните 1-2 дена, јавува Агенција Анадолија (АА).

„Во наредните 1-2 дена ќе биде достапен комплетот за брзо дијагностицирање на вирусот“, изјави министерот за здравство на Турција, Фахретин Коџа, пред пратениците во турскиот Парламент.

„Турција досега спроведе над 10.000 тестови. Нашата цел е да се извршат најмалку 10.000 до 15.000 тестови дневно“, изјави тој.

Министерот за здравство изјави дека Владата ќе го зголеми бројот на лаборатории на 36.

„Досега, 18 лаборатории ги извршуваат тестирањата во соработка со две универзитетски фондации“, изјави Коџа.

Тој рече дека Турција има 99.797 еднокреветни соби кои можат да се користат за изолација или интензивна нега на пациенти.

Коџа упати пофалби до најсовремените градски болници. „Подготвени сме за сите можни најлоши сценарија во однос на физичката и технолошката инфраструктура.“

Турција синоќа го потврди вториот смртен случај од коронавирусот.

Потврдени се 93 нови случаи на зараза при што бројот на заразени во земјата изнесува 191.

Турскиот министер за здравство повтори дека превентивните мерки за спречување на епидемијата, како што се останување дома и избегнување јавни собири, треба да бидат сфатени сериозно.