Associated Press
09 Април 2022•Ажурирај: 12 Април 2022
ПЕКИНГ (АА) - Најголемиот кинески град Шангај наскоро ќе почне со укинување на карантинот во заедниците кои нема да пријават ниту еден случај на зараза со коронавирус во рок од 14 дена, известува Агенција Анадолија (АА).
Одлуката е донесена по уште еден круг тестирања за Ковид-19, соопштија кинеските власти.
Новиот круг тестирања доаѓа бидејќи во градот денес се пријавени 23.000 нови случаи на зараза, од кои поголемиот дел се асимптоматски. Голем дел од Шангај, со популација од 26 милиони жители, се наоѓа во локдаун од 28 март, што доведе до жалби од жителите за недостаток на храна и производи за основни потреби.
И власта на Гуангџоу најави дека овој град, сместен северозападно од Хонгконг, ќе почне со масовно тестирање на своите 18 милиони жители.
Во петокот во овој град се регистрирани само две потврдени инфекции.
Според новите мерки, подрачјата во Шангај ќе биде класифицирани како „претпазливо“, „надгледувано“ и „заклучено“, во зависност до резултатите на последното тестирање.
Жителите од подрачјата за кои се смета дека од „претпазливост“ се без инфекции во последните две недели, ќе можат да се движат во својот округ, но собирите и понатаму ќе бидат ограничени.
Во меѓувреме, во „надгледуваните“ подрачја, жителите ќе можат да се движат во своите квартови, додека граѓаните во „заклучените“ подрачја ќе мораат да останат во своите домови.
Шангај изгради преку 100 импровизирани болници за лекување на пациентите заразени со Ковид-19 со повеќе од 160.000 легла.
Кина се соочува со една од најголемите локални епидемии откако почна пандемијата.
Таа е една од ретките земји која се држи до политиката „нулта Ковид“, преземајќи драстични мерки, како што се затворање и масовно тестирање, сè со цел да се идентификува и изолира секој единечен случај.
Кина сѐ уште е затворена за меѓународни патувања, иако поголемиот дел од светот бара начини како да живее со вирусот.
