СКОПЈЕ (АА) - Малото приморско гратче Портофино, сместено во регионот Лигурија на северот на Италија, блеска во полн сјај, пречекувајќи илјадници туристи кои уживаат во неговата природна убавина и шармантна архитектура, јавува Анадолу.
Гратчето е опкружено со туристички бродови и луксузни јахти, додека се издвојува со своите живописни куќи, зеленилото кое се прелева по ридовите и смарагдно зелените води на Лигурското Море.
Портофино е препознатливо по своите обоени фасади кои го красат заливот, во кој се вкотвени јахти, но и неколку традиционални рибарски чамци.
Кристално чистите води на Портофино нудат идеални услови за пливање, нуркање и возење со чамци.
Посетителите кои претпочитаат копнени авантури можат да уживаат и во пешачење низ бројните патеки што водат до панорамски точки од кои се отвора поглед кон морето.
Портофино денес претставува една од најпосетуваните дестинации на италијанската ривиера и важи за едно од најромантичните места во земјата, комбинирајќи природна убавина, културно наследство и модерен луксуз.
