Извршниот директор на „ОпенАИ“ ја повика технолошката индустрија да ги поддржи колегите муслимани

АНКАРА (АА) - Извршниот директор на „ОпенАИ“ (OpenAI), Сем Алтман, изјави дека на припадниците на муслиманската и арапската заедница во технолошката индустрија им е непријатно да зборуваат за нивните неодамнешни искуства, стравувајќи од реакција и штета врз нивните кариери, повикувајќи се на влијанието на израелската војна во Газа, пренесува Анадолу.

„Муслиманските и арапските (особено палестинските) колеги во технолошката заедница со кои разговарав се чувствуваат неслободно кога зборуваат за своите скорешни искуства, често поради страв од одмазда и нарушени изгледи во кариерата“, напиша Алтман на платформата Х.

Нагласувајќи ја потребата од единство во рамките на технолошката индустрија за поддршка на овие колеги, Алтман додаде дека „индустријата треба да биде обединета во поддршката на овие колеги“.

„Ова е ужасно време. И понатаму се надевам на вистински и траен мир, и дека во меѓувреме можеме да се однесуваме едни кон други со емпатија“, рече Алтман, а под објавата додаде:

„Јас сум Евреин. Верувам дека антисемитизмот е значаен и растечки проблем во светот и гледам дека многу луѓе во нашата индустрија се залагаат за мене, што длабоко го ценам. Но, гледам многу помало залагање за муслиманите.“