Muhammed Enes Çallı
28 Април 2023•Ажурирај: 30 Април 2023
ИСТАНБУЛ (АА) - Турскиот производител на беспилотни летала „Бајкар“ и Азербејџан потпишаа протокол за добра волја за заедничко производство на системи за беспилотни летала, јавува Анадолу.
Халук Бајрактар, извршниот директор на „Бајкар“, и заменик-министерот за одбрана на Азербејџан, Агил Гурбанов, го потпишаа протоколот за време на ТЕХНОФЕСТ, најпознатиот турски фестивал за воздухопловство и технологија што се отвори вчера на аеродромот „Ататурк“ во Истанбул.
На церемонијата на потпишувањето присуствуваше и Рамиз Тахиров, командант на Воздухопловните сили на Азербејџан.
Говорејќи на церемонијата, Бајрактар истакна дека денес постои многу блиска и силна соработка меѓу Азербејџан и Туркије во технологијата на беспилотни летала со сфаќањето „една нација, две држави“.
„Денес сме овде со заменик-министерот за одбрана на Азербејџан, Агил Гурбанов, и Азербејџан за да ја продолжиме оваа соработка. Заедно со командантот на Воздухопловните сили, Рамиз Тахиров, потпишавме заеднички протокол за добра волја и наша цел е да ја унапредиме силната соработка помеѓу нашите земји“, рече Бајрактар.
Тој истакна дека Бајрактар Технолоџи Азербејџан е основана од „Бајкар“ во главниот азербејџански град Баку, со цел да развие напредни технологии, автономни технологии и вештачка интелигенција што поддржуваат технологии од новата генерација.
- 424 домашни и странски пронајдоци ќе бидат претставени на ИСИФ'23 -
Во рамките на фестивалот ТЕХНОФЕСТ започна 8. Меѓународен саем на пронајдоци во Истанбул (ИСИФ'23) со пронајдоци од 31 земја.
На ИСИФ'23 ќе се претстават 424 домашни и странски пронајдоци.
На свеченото отворање присуствуваше и турскиот министер за индустрија и технологија Мустафа Варанк.
Варанк истакна дека младите луѓе и пронаоѓачите ќе имаат можност да ја покажат својата работа на саемот, кој ќе ги зближи пронаоѓачите и инвеститорите.
