Макрон: Можно е Франција да ја признае палестинската држава во јуни

Франција можно е да ја признае државата Палестина „во јуни“ за време на меѓународната конференција со која копретседава заедно со Саудиска Арабија, изјави францускиот претседател Емануел Макрон, пренесува Анадолу.

„Мора да се придвижиме кон признавање и тоа ќе го направиме наредните месеци“, рече Макрон во интервјуто емитувано на Франс 5.

Тој истакна дека планираната конференција за имплементација на дводржавното решение за израелско-палестинскиот конфликт, која се очекува да се одржи во Њујорк, може да означи пресвртница.

„Наша цел е да претседаваме со оваа конференција (за Палестина) со Саудиска Арабија некаде во јуни, каде што би можеле да го финализираме ова движење на заемно признавање од неколку страни“, рече тој.

Неговите изјави доаѓаат во период на зголемени меѓународни повици за политичко решавање на конфликтот во Газа, каде што Израел од октомври 2023 година досега уби над 50.000 Палестинци, и поширокиот израелско-палестински спор.

Во февруари 2024 година Макрон рече дека признавањето на палестинската држава „не е табу за Франција“, нагласувајќи дека таквиот потег е морална и политичка потреба.

„Им го должиме тоа на Палестинците, чии аспирации се газат предолго. Тоа им го должиме на Израелците кои го доживеаја најголемиот антисемитски масакр на нашиот век. Му го должиме тоа на регионот што копнее да избега од промоторите на хаосот и сејачите на одмазда“, рече Макрон тогаш.

Во моментов 147 од 193 земји членки на Обединетите нации (ОН) ја признаваат државата Палестина. Минатиот мај Шпанија, Ирска и Норвешка се приклучија на листата, со што вкупниот број земји на ЕУ што ја признаа Палестина достигна 10. Други земји се Бугарија, Кипар, Малта, Унгарија, Полска, Шведска и Романија.

Неколку други европски земји, особено во Источна Европа, меѓу кои Украина, Албанија, Србија, Црна Гора и Белорусија, исто така, ја признаа палестинската државност.