„Американскиот долар го губи својот глобален кредибилитет“

МОСКВА (АА) - Рускиот министер за надворешни работи, Сергеј Лавров, критикувајќи ги санкциите на Соединетите Американски Држави (САД) кон Иран и блокирањето на трговијата со Иран, нагласи дека поради тие чекори доларот го губи глобалниот кредибилитет, пренесува Anadolu Agency (AA).

Лавров, во својот говор на Државниот институт за меѓународни односи во Москва (MGİMO) ја критикуваше американската политика за санкции, наведувајќи дека Иран има право да тргува со надворешниот свет во согласност со постојните договори.

„Пред сè, тие имаат право да заработуваат приходи од продажбата на својата нафта“, истакна рускиот министер.

Лавров потсети дека САД спречуваат набавка на нафта од Иран, поради што многу компании се наоѓаат во тешка ситуација.

„Поради овој чекор, многу земји и компании се наоѓаат во многу тешка ситуација. Американскиот долар го губи својот глобален кредибилитет поради санкциите наметнати врз други земји, како и чекорите на САД кон Иран.“

На 8 мај 2018 година, администрацијата на Трамп соопшти дека се повлекува од Договорот за нуклеарната програма со Иран во 2015 година, со цел да се постигне нов договор, кој ќе ги вклучи балистичките ракети и регионалните активности на администрацијата на Техеран.

Поради санкциите наметнати од страна на САД, Јапонија, Јужна Кореја и европските земји целосно го прекинаа увозот на нафта од Иран.